༄༅།། བཅོམ་ལྡན་འདས་རྗེ་བཙུན་མ་ཀུ་རུ་ཀུ་ལེ་མ་ལ་བསྟོད་པས་གྲུབ་པ་ཐུགས་རྗེ་རྣམ་པར་རོལ་བའི་ང་རོ།


༄༅།།རྗེ་བཙུན་ངག་གི་དབང་བོ་ལ་ཕྱག་འཚལ་ལོ།།
ཕུན་ཚོགས་བློ་ཆེན་དྲི་མེད་སྣང་བ་ཕྱོགས་ཀྱི་མཐར་སྤྲོ་ཀུན་རྨོངས་མུན་པས་ནམ་ཡང་སྒྲིབ་མེད་མྱང་འདས་ཞི་བའི་འཆི་མེད་ལམ་བཟང་སྐྱེད་ཚལ་ཉམས་དགར་ཏིང་འཛིན་མལ་དུ་དངོས་འཛིན་འོག་པག་ལྷུང་གྱུར་ཅིག།
སྙིང་རྗེའི་ལང་ཚོ་ཡོངས་སུ་རྫོགས་པ་མཛེས་སྡུག་ཡབ་ཀྱི་རག་པ་ལས་འདས་སྤུ་ལོང་རྣམ་རྒྱས་དཔའ་བོའི་བརྟན་པ་གཅིག་ཆར་འགོག་མཁས་མ་མཆུའི་སྦྲང་རྩིའི་ཉེར་སྟེར་ཚེམས་ཕྲེང་རྒྱུ་སྐར་བུ་མོའི་དཔལ།།
བདེ་ཆེན་བདག་པོའི་རོ་འཛིན་གློག་གི་གོ་དམར་གོས་གྱོན་བིམ་པའི་མདངས་བཟང་མཚོན་རིས་བཀྲ་བའི་མཆུ་སྒྲོས་ཟུང་དག་འདབ་བརྒྱའི་འདབ་མ་ཞལ་རས་ཟླ་བའི་འོད་ཀྱིས་འཛུམ་ཞིང་མཐོན་མཐིང་དབུ་སྐྲའི་འཆིང་བ་ལྷོད།།
གང་ཡང་སྟོང་ཉིད་ཡོལ་བའི་ཕག་ཏུ་འདོད་སྒྲོགས་རྣམ་པར་སྦེད་མཁས་སྒྲུབ་པོ་མཐའ་དག་སྐྱབས་པ་ལ་རེངས་གར་གྱིས་གོམ་སྟབས་མྱུར་འགོད་ཞབས་གདུབ་རིན་ཆེན་ཆུ་བོའི་རལ་པས་རལ་བའི་ཕྲེང་བ་མཛེས་གྱུར་ཅིག།

དཔལ་ལྡན་ཉིན་བྱེད་བྱེ་བའི་འོད་ཟེར་གྱི།།                        མདངས་ཀྱིས་འཁྱུད་པ་པད་མ་ར་ག་ཡི།།
རི་དབང་སྣ་ཚོགས་གར་གྱིས་རོལ་བའི་དཔེས།།                    རྗེས་སུ་དཔག་བྱ་བཅོམ་ལྡན་མ་དེར་འདུད།།

སྐལ་བཟང་དགེ་སྤྱད་ལི་ཁྲིའི་ཆུ་གཏེར་ངོགས།།                   འདམ་སྐྱེས་བནྡྷུ་ཛི་བའི་འདབ་མ་ལ།།

མཚན་དཔེ་གློག་ཕྲེང་འཁྱུག་པ་ཁྱོད་ཀྱི་སྐུ།།                        མཐོང་ན་རབ་དགའ་དེ་ལ་ཕྱག་འཚལ་ལོ།།

ཚོགས་གཉིས་གསེར་ལྡན་དཔལ་ལས་ཀེ་ཤུ་ཀའི།།                འཁྲི་ཤིང་མཁའ་ཡི་རྩེ་མོ་འཇལ་བ་ཞིག།

རབ་འཁྲུངས་སྐྱེ་དགུའི་རེ་སྐོང་དཔག་བསམ་ཤིང་།།             འདོད་དགུའི་དངོས་གྲུབ་སྩོལ་ལ་ཕྱག་འཚལ་ལོ།།

དགེ་ལེགས་དཔྱིད་ཀྱི་དཔལ་མོ་མགོན་ཁྱོད་ཀྱིས།།                ལང་ཚོའི་རྩི་ཐོག་བསྐྱེད་པའི་ཁུར་གྱི་ངལ།།
དངོས་གྲུབ་གེ་སར་རྒོད་པའི་བཅུད་བཟང་གིས།།                  རྒུད་པའི་གོ་སྐབས་འཕྲོག་ལ་གསོལ་བ་འདེབས།།

ཀུ་རུ་ཀུ་ལེ་ཞེས་བྱ་ཁྱོད་ཀྱི་མཚན།།                                    འཛིན་པ་དེ་དག་འགྲོ་འདི་དབང་མེད་དུ།།

དགའ་བའི་འཆིང་བྱེད་རིགས་སྔགས་མཁན་པོ་སྟེ།།              ཀུན་དགའི་འབྱུང་གནས་ཆེ་ལ་ཕྱག་འཚལ་ལོ།།

ཁྱོད་སྐུའི་རབ་དམར་མདངས་བཟང་བརྒྱ་བྱིན་གཞུའི།།         དང་བ་ཕམ་བྱེད་འོད་ཀྱིས་ཕྱོགས་ཀུན་འགེངས།།
ཐུན་མཚམས་སྤྲིན་གྱི་བུ་མོ་སྐྱེངས་པའི་གདོང་།།                   ངོས་འཚུམ་གནག་པར་མཛད་ལ་ཕྱག་འཚལ་ལོ།།

ས་སྲུང་བུ་ཡི་འདྲེན་བྱེད་ལི་ཁྲིའི་ཚོན།།                                བྱེ་བས་འཁྱུད་པས་དངོས་ཀུན་ཕ་མཐའ་ལ།།

འོད་ཟེར་འགྱེད་ཀྱང་དེ་ནི་ཁྱོད་སྤྱན་གྱི།།                            དཔེར་ཡང་བཟོད་པ་མིན་ལ་ཕྱག་འཚལ་ལོ།།

སྒེག་ལྡན་མཐེབ་སོར་འཇམ་པོས་བསྐུལ་བ་ལས།།                  གཞུ་རྒྱུད་སྒྲ་དབྱངས་དབྱར་སྐྱེས་རྔ་གསར་སྟོང་།།

ངོ་མཚར་བགྱིད་འདིས་དབྱངས་ཅན་རྒྱུད་མང་སྒྲ།།              ངེས་པར་ཕམ་མཛད་དེ་ལ་ཕྱག་འཚལ་ལོ།།

རབ་དམར་མཁུར་ཚོས་འོད་སྟོང་ཐིག་ལེའི་ཚོན།།                 འཕོས་པའི་ཉག་ཕྲན་སྙིང་ལ་རེག་པ་ན།།

ཆགས་པའི་མྱོས་བྱེད་མདའ་ལྔའི་སྒྲ་ལྡན་ནི།།                       དཔལ་འདིའི་རྗེས་སུ་སློབ་ལ་ཕྱག་འཚལ་ལོ།།

སྙན་རྒྱན་རིན་ཆེན་འབར་བའི་འོད་རིས་ཅན།།                     སྒྲོ་འཛིན་གློག་ཕྲེང་གཡོ་བ་མདེའུ་ཡི།།

སྤར་ཁྱིམ་ཅན་འདིས་མཁའ་ལྡིང་བཅོམ་པ་ན།།                    ཀླུ་དབང་ཚོགས་ཀྱིས་བསྔགས་ལ་ཕྱག་འཚལ་ལོ།།

མཛེས་སྡུག་ཀུན་གྱི་རྩེ་ལ་འཛེགས་པ་ཁྱོད།།                         ཉི་མ་ཡིས་ཀྱང་འོད་ཟེར་སྤུ་ལོང་རྩེར།།

པད་མའི་ནགས་དང་བདུད་སྡེ་ཤི་བའི་མགོར།།                    ཁྱོད་ཀྱི་ཞབས་མཐིལ་མཆོད་ལ་ཕྱག་འཚལ་ལོ།།

ཟླ་བ་དམར་པོའི་ཞལ་ཅན་བརྒྱད་གཉིས་ཀྱི།།                      ལང་ཚོའི་ཡིད་འཕྲོག་རེག་བྱེད་ཕྱག་གི་ནི།།

ཟག་མས་ལྕགས་ཀྱུ་ཞགས་པའི་སྦྱོར་མཁས་ཀྱིས།།                ས་གསུམ་དབང་དུ་སྡུད་ལ་ཕྱག་འཚལ་ལོ།།

འབུར་འབུར་ཟླུམ་རྒྱས་ནུ་མ་ཟུང་གི་རྩེར།།                        ཁྲོལ་ཁྲོལ་རིན་ཆེན་མགུལ་རྒྱན་སྒྲ་སྙན་སྒྲོག།

འཛུམ་འཛུམ་སྙན་གོང་ཨུཏྤལ་རྒོད་པོ་དེར།།                    ཡང་ཡང་ཟུར་མིག་མཛད་ལ་ཕྱག་འཚལ་ལོ།།

ལྷག་ལྷག་འོད་འབར་ཉི་གཞོན་འཆར་གའི་སྐུ།།                ཡང་ཡང་ལྟ་བས་ནམ་ཡང་མི་ངོམས་ཤིང་།།

ཆིལ་ཆིལ་མིག་ཆུ་རྒྱས་པའི་གྲུབ་རིག་གིས།།                      མཐོང་མཐོང་མཆོད་ཡོན་ཕྱིན་དེར་ཕྱག་འཚལ་ལོ།།

ཟུམ་ཟུམ་མིག་ཅན་དབུགས་བྲལ་སྐྱེ་བོའི་སྟེང་།།                 ལིང་ལིང་གཡོ་བའི་གར་སྟབས་རོལ་རྩེད་དང་།།

ལྷང་ལྷང་གླུ་དབྱངས་གྲེ་འགྱུར་བྱེ་བ་བརྒྱས།།                     དུང་དུང་འགྲོ་ཡིད་འཛིན་ལ་ཕྱག་འཚལ་ལོ།།

གྲགས་པའི་རྗེས་འགྲོ་ནུས་ལྡན་བདེ་སོགས་ཀྱིས།།               མ་ཚིམ་ཁྱོད་ཞལ་ལྟ་ཕྱིར་འོངས་པ་འདི།།

ད་ལྟ་ནུ་ལྡན་ཀུན་ལ་ཆགས་བྲལ་ཏེ།།                               ཁྱོད་སྐུ་ཏིང་འཛིན་སྒྲུབ་ལ་ཕྱག་འཚལ་ལོ།།

འདི་ན་ས་སྐྱོང་བཀའ་ཡིག་འཆང་བ་ལའང་།།                   རིམ་གྲོ་བགྱིད་ན་ཁྱོད་མཚན་འཛིན་པ་དེའི།།

རྐང་རྡུལ་བདག་ཅག་སྤྱི་བོས་བསྟེན་འོས་ཞེས།།                 འགྲོ་འདིས་གཅིག་ཆར་སྒྲོག་ལ་ཕྱག་འཚལ་ལོ།།

སྨིན་ལེགས་བྱི་རུའི་འཁྲི་ཤིང་འདོད་པ་འཇོ།།                     ནུ་འབུར་མེ་ཏོག་ཕོན་པོའི་ཁུར་གྱིས་དུད།།

འདི་མཐོང་འཇིག་རྟེན་དཔག་བསམ་རྐང་འཐུང་ལ།།         ནམ་ཡང་གུས་པས་དམན་ལ་ཕྱག་འཚལ་ལོ།།

མཆོད་མཁས་མཆོད་སྦྱིན་བརྒྱ་བས་གཏོར་གྱུར་པ།།             མཁས་མཆོག་འོད་ཀྱིས་སྣང་བྱེད་མནྡྷ་རའི།།

 མེ་ཏོག་མདངས་བཀྲ་ཁྱོད་སྐུའི་མདངས་འོད་ཀྱིས།།           ཀུན་ཏུ་མོག་པོར་མཛད་ལ་ཕྱག་འཚལ་ལོ།།

ཉིན་བྱེད་རྟ་མཆོག་འོད་ཟེར་ལྗང་ཁུ་ནི།།                          དམར་བོ་ཉིད་བྱེད་མཁའ་ཡི་མེ་ལོང་ཡང་།།

ཁྱོད་དང་ཉེ་བའི་པད་མོའི་མཛེས་མཐུན་དུ།།                   བསྒྱུར་མཁས་མིག་འཕྲུལ་མཁན་དེར་ཕྱག་འཚལ་ལོ།།

དད་པའི་ལྕགས་ཀྱུ་ལྕི་བའི་དབང་གྱུར་པ།།                      ཁྱོད་ཞབས་གཉིས་འཐུང་སེན་མོའི་མཆེ་བ་དྲུག།

རབ་དཀར་དངོས་གྲུབ་རིན་ཆེན་དྲ་བ་ཅན།།                   རལ་བའི་ནགས་ན་དགྱེས་ལ་ཕྱག་འཚལ་ལོ།།

སྨྲ་མཁས་ཀུན་གྱི་མགྲིན་པ་རོ་འཛིན་གྱིས།།                     ཞགས་པས་འཆང་བྱེད་ཞབས་དྲུང་པ་ལ་ནི།།

ཐལ་མོ་སྦྱར་བར་འགོད་མཁས་དབྱངས་ཅན་སྲས།།           དྲན་དབང་གྲགས་པ་བསྟོད་ཚིག་ཕྲེང་བ་སྤེལ།།

ཡིད་ཀྱི་པད་མཚོར་ངང་བ་དགའ་བ་ཁྱོད།།                    འདོད་པའི་སྙིང་ལ་བཟུང་སྟེ་སྙན་ཚིག་གི།

འཛུམ་རླབས་དལ་བུས་གཡོ་བའི་མཆོད་ཡོན་གྱི།།            འདོད་རྒུའི་རྫ་རྔ་ཅི་ཡང་སྒྲོག་གྱུར་ཅིག།
ཅེས་པ་འདི་ནི་བཅོམ་ལྡན་འདས་ཤཱཀྱ་སེང་གེའི་རྗེས་སུ་སྐྱེས་པ་བླངས་པའི་རིག་སྔགས་འཆང་གྲུབ་པ། ཁ་བ་རི་བའི་སྙན་ངག་མཁན་ཆེན་པོ་ཞང་ཞུང་ཆོས་དབང་གྲགས་པ་ཞེས་བྱ་བས། དུས་ཀྱི་ལོ་ཆུ་སྟོད་ཀྱི་ཟླ་བ་ལ་འབྲོག་རི་བོ་ཆེ་དགའ་ལྡན་དུ་གྲུབ་པ་རེ་ཞིག་རྫོགས་སོ།།

རྩོམ་འདི་ཀན་སུའུ་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི<<ཞང་ཞུང་ཆོས་དབང་གྲགས་པའི་བསྟོད་ཚོགས་བཞུགས་སོ>>ལས་བཤུས།