༄༅།། སོ་སོ་ཐར་པའི་མདོའི་འགྲེལ་པ་རིན་ཆེན་འབྱུང་གནས་ཞེས་བྱ་བ་ཀརྨ་པ་མི་བསྐྱོད་རྡོ་རྗེས་མཛད་པ་བཞུགས།

འདུ་ཤེས་སྦྱོར་བ་དང་བཅས་པ་ནི་ཤེས་བཞིན་དུ་ཞེས་སོགས་ཏེ།རྟེན་དགེ་སློང་གིས་ཁྱིམ་པ་མཚན་ཉིད་དང་ལྡན་པས་དགེ་འདུན་གྱིའམ་གང་ཟག་གཞན་ལ་བསྔོས་པའི་དངོས་པོ་གོས་སམ་ལྷུང་བཟེད་འདུ་ཤེས་མ་འཁྲུལ་ཞིང་།ཀུན་སློང་རྐུ་སེམས་མེད་ཀྱང་རང་ལ་བསྒྱུར་འདོད་ཀྱི་བསམ་པས་སྦྱོར་བ་ང་ལ་ཕུལ་ཞེས་བརྗོད་པས།མཐར་ཐུག་དེ་ཐོབ་པ་ན་སྤང་བའོ།།
གང་ཟག་གཞན་ལ་བསྔོས་པ་གཞན་ལ་བསྒྱུར་བ་ལྟ་བུ་དང་།གཙུག་ལག་ཁང་གི་ཀ་བ་ལ་བསྔོས་པ་གདུང་མར་བསྒྱུར་བ་ལྟ་བུ་དང་།བང་རིམ་བུམ་པ་ལ་བསྒྱུར་བ་ལྟ་བུ་དང་།དུད་འགྲོ་གཞན་ལ་བསྔོས་པ་གཞན་དུ་བསྒྱུར་བ་ལྟ་བུ་དང་།རང་གིས་གཞན་ལ་ཡིད་ཀྱིས་བསྔོས་པ་མི་སྦྱིན་པ་ལྟ་བུ་ཉེས་བྱས་སོ།།
ལྷག་མ་ཟ་བའི་དུད་འགྲོ་བཙལ་ཏེ་མ་༼༣༣ན༽རྙེད་ན་གཞན་ལ་བྱིན་ཀྱང་ཉེས་མེད་དོ།།
གསོག་འཇོག་གི་སྤང་བ་ནི།ལོངས་སྤྱད་པར་གནང་བའི་དུས་ནི།བཅོམ་ལྡན་འདས་ཞེས་སོ།།
འདས་པ་ནི་དེ་ལ་ཞེས་སོགས་སོ།།
འདོན་པའི་མཇུག་བསྡུ་བ་ནི།ཚེ་དང་ལྡན་པ་ཞེས་སོགས་ཏེ།རྟེན་དགེ་སློང་ནད་པ་མིན་པས་དངོས་པོ་ལྷའི་བདུད་རྩི་དང་།སྣར་བླུག་པ་ཙམ་ལས་གཞན་པ་དགེ་སློང་གིས་བསྟེན་རུང་གི་སྨན་བཞི་པོ་གང་རུང་བྱིན་ལེན་བྱས་པ་འདུ་ཤེས་མ་འཁྲུལ་ཞིང་ཀུན་སློང་ཕྱིས་ལོངས་སྤྱོད་འདོད་ཀྱི་བསམ་པས།སྦྱོར་བ་རང་རང་གི་གསོག་འཇོག་གི་དུས་ལས་འདས་པ་སྟེ།ཕྱི་དུས་སྨན་བཞི་པོ་བྱིན་ལེན་མ་བྱས་པ་ཉི་མ་ཕྱེད་ཡན་ཆད་བསྟེན་དུ་རུང་ཞིང་།དུས་རུང་ལ་ཕྱེད་ཡོལ་ནས་བྱིན་ལེན་མ་ཞིག་པར་བཅང་ན་གསོག་འཇོག།བུ་རམ་ལྟ་བུ་ཞག་བདུན་པའི་སྨན་བདུན་པར་བྱིན་གྱིས་བརླབ་པ་སླར་ཞག་བདུན་ལས་འདས་ཏེ་མཐར་ཐུག་བརྒྱད་པའི་སྐྱ་རེངས་དང་པོ་ཤར་བའི་ཚེ་དང་།།
ན་ཚོད་དུ་རུང་བ་ཐུན་ཚོད་ལས་འདས་པར་འཇོག་པ་རྣམས་སྤང་བའོ།།
ད་ནི་སྤང་བའི་ལྟུང་བྱེད་བཤད་ཟིན་པ་ལ།ལྟུང་བྱེད་འབའ་ཞིག་པ་ལ།སྤྱི་སྡོམ་ནི།ཤེས་བཞིན་དང་ནི་ས་བོན་དང་།།
མ་བསྐོས་པ་དང་ཡང་དང་ཡང་།།
ཆུ་དང་ཁྱིམ་དང་བསམ་བཞིན་དང་།།
མགྲོན་མང་རྐུན་མ་ཆོས་སྟོན་ནོ།།
དེའི་བཅུ་ཚན་དང་པོའི་དངོས་སྡོམ་ལ།།
རྫུན་སྐྱོན་དགེ་སློང་ཕྲ་མ་དང་།།
སྐྱོ་སྔོགས་བྱེད་དང་སྟོན་པ་དང་།།
འདོན་དང་གནས་ངན་ལེན་དང་ཆོས།།
བཤེས་ངོར་བྱེད་དང་ཁྱད་དུ་གསོད།།
ཅེས་པའོ།།
བདེན་པའི་ལུང་འབོགས་པ་ནི།ཚེ་དང་ལྡན་པ་ཞེས་སོགས་སོ།།
འདུ་ཤེས་ཀྱི་མཚན་༼༣༣བ༽ཉིད་ནི།ཤེས་བཞིན་དུ་ཞེས་སོགས་སོ།།
བརྗོད་བྱ་སྦྱོར་བ་དང་བཅས་པ་ནི་རྫུན་དུ་ཞེས་སོགས་ཏེ།།
དེ་ཡང་བཅས་ལྡན་དགེ་སློང་གིས་ཕམ་པར་གྱུར་པའི་རྫུན་དང་།ཤེས་བཞིན་དུ་ཆོས་མ་ཡིན་པ་ལ་ཆོས་དང་ཆོས་ཡིན་པ་ལ་ཆོས་མ་ཡིན་པར་སྟོན་པ་སྦོམ་པོར་འགྱུར་བའི་རྫུན་དང་།གསོ་སྦྱོང་གི་ཚེ་ཅི་འདི་ལ་ཁྱེད་ཡོངས་སུ་དག་གམ་ཞེས་ལན་གསུམ་དུ་དྲིས་པ་ན་ཅང་མི་སྨྲ་བས་འདའ་བར་བྱེད་པ་ལྟ་བུ་ཉེས་བྱས་སུ་འགྱུར་བའི་རྫུན་དང་།འོག་ནས་འབྱུང་བ་ལྟར་དགེ་འདུན་ལྷག་མས་སྐུར་པ་འདེབས་པའི་རྫུན་རྣམས་ལས་གཞན་པའི་རྫུན་རྣམས་ཤེས་བཞིན་གྱི་རྫུན་ནོ།།
འདུ་ཤེས་མ་འཁྲུལ་ཞིང་ཀུན་སློང་སྨྲ་འདོད་ཀྱི་བསམ་པས།སྦྱོར་བ་རང་གིས་སྨྲས་ཏེ་མཐར་ཐུག་ཉན་པོས་བརྡ་སྤྲོད་པའི་དོན་གོ་བ་ན་ལྟུང་བའོ།།
བསླབ་བྱ་ནི་དཀོན་མཆོག་སོགས་ལ་མནའ་འདོར་བར་མི་བྱའོ།།
སྐྱོན་སྨྲ་བའི་གཞི་ནི་མིའི་ཞེས་སོགས་སོ།།
སྦྱོར་བ་ནི་སྨྲ་ན་ཞེས་སོགས་ཏེ།རྟེན་དགེ་སློང་གིས་ཡུལ་དགེ་སློང་ཕ་རོལ་པོ་ལ་འདུ་ཤེས་མ་འཁྲུལ་ཞིང་ཀུན་སློང་སྐྱོན་བརྗོད་འདོད་ཀྱི་བསམ་པས།སྦྱོར་བ་ཡུལ་དུས་དེར་སྐྱོན་དུ་གྲགས་པས།ཚིག་འཇམ་རྩུབ་གང་གི་སྨྲས་ཀྱང་རུང་མཐར་དོན་གོ་བ་ན་དགེ་སློང་དེ་མི་དགའ་བར་མ་གྱུར་ཀྱང་ལྟུང་བའོ།།
སྐྱོན་དེ་འདོན་པར་འདོད་པར་གྱུར་པའི་ཕན་སེམས་ཀྱིས་སྨྲས་པ་ལ་ལྟུང་བ་མེད་དོ།།
ཕྲ་མ་ལ།གཞི་ནི་དགེ་སློང་ཞེས་དང་།སྦྱོར་བ་ནི་ཕྲ་མ་ཞེས་ཏེ།རྟེན་དགེ་སློང་གིས་ཡུལ་དགེ་སློང་མཐུན་པ་དབྱེ་འདོད་ཀྱི་བསམ་པས།སྦྱོར་བ་མིང་ནས་སྨྲོས་ཏེ་ཕྲ་མའི་ཚིག་སྨྲས་པ་མཐར་ཐུག་དོན་གོ་༼༣༤ན༽བ་ན་ལྟུང་བའོ།།
སྐྱོ་སྔོགས་ལ།གཞི་ནི་ཡང་ཞེས་དང་།སྦྱོར་བ་ནི་ཤེས་བཞིན་ཏེ།དེ་ཡང་རྟེན་རྩོད་པའི་རྒྱུ་ཤེས་བཞིན་ཞི་བྱེད་ལ་གཏོགས་པའི་དགེ་སློང་གིས་ཡུལ་དགེ་སློང་ཕ་རོལ་པོ་དག་གི་ཆོས་ཀྱི་རྩོད་པ་བཞི་པོ་གང་རུང་དགེ་འདུན་གྱིས་ཆོས་ཕྱོགས་སུ་ཞི་བར་བྱས་པ་འདུ་ཤེས་མ་འཁྲུལ་ཞིང་ཀུན་སློང་རྩོད་པ་དཀྲུག་འདོད་ཀྱི་བསམ་པས།སྦྱོར་བ་ཁྱེད་ཅག་གི་རྩོད་པ་དེ་ལེགས་པར་ཞི་བར་བྱས་པ་མ་ཡིན་ཅེས་སོགས་སྐྱོ་སྔོགས་ཀྱི་ཚིག་བརྗོད་པས་མཐར་ཐུག་ཡུལ་གྱིས་དོན་གོ་བ་ན་ལྟུང་བའོ།།
ཞི་བྱེད་ལ་མི་གཏོགས་པ་དང་།ཆོས་མིན་པའི་ཕྱོགས་སུ་ཞི་བར་བྱེད་པ་ལ་སྐྱོ་སྔོགས་བྱས་ན་ཉེས་བྱས་སོ།།
ཁྱིམ་པ་མོ་ལ་ཆོས་སྟོན་པ་ནི།རྟེན་ཡུལ་དང་བཅས་པ་ནི་ཡང་ཞེས་སོགས་སོ།།
སྦྱོར་བ་དམིགས་བསལ་དང་བཅས་པ་ནི་སྟོན་ན་ཞེས་སོགས་ཏེ།རྟེན་དགེ་སློང་གིས་ཡུལ་བུད་མེད་ཁྱིམ་པ་མོ་ཉེ་དུ་མ་ཡིན་པ་ལུས་བསྟེན་དུ་རུང་བ་སྨྲ་ཤེས་དོན་གོ་བ།རྫུ་འཕྲུལ་ཅན་དང་མཁས་པའི་རང་བཞིན་ཅན་མ་ཡིན་པ་འདུ་ཤེས་མ་འཁྲུལ་ཞིང་ཀུན་སློང་ཆོས་སྟོན་འདོད་ཀྱི་བསམ་པ་དང་།སྦྱོར་བ་གནས་གཅིག་ཏུ་ཁྲིམས་གྲོགས་མེད་པར་བཀའ་ལ་གཏོགས་པའི་ཆོས་ཚིག་ལྔའམ་དྲུག་ལས་ལྷག་པར་སྟོན་ཏེ།མཐར་ཐུག་དོན་གོ་བ་ན་ལྟུང་བའོ།།
བུད་མེད་མཁས་པས་ཆོས་དྲིས་པ་སོགས་དང་།དུས་ཁྲིམས་འབོགས་པ་དང་།ཡོན་བཤད་པ་འདི་ལ་ལྟུང་བ་མེད་དོ།།
འདོན་པ་ནི་རྟེན་ཡུལ་ཡང་ཞེས་པ་དང་།སྦྱོར་བ་ནི་འདོན་ན་ཞེས་རྟེན་དགེ་སློང་གིས་འདོན་པའི་དངོས་པོ་བཀའ་དང་དེའི་དགོངས་འགྲེལ་གྱི་བསྟན་བཅོས་བསྙེན་པར་༼༣༤བ༽མ་རྫོགས་པ་དང་གཅིག་ཅར་རམ།མཇུག་ཐོག་ཏུ་སྦྱོར་བ་མི་འདོད་བཞིན་དབང་མེད་མ་གཏོགས།འདོན་པས་མཐར་ཐུག་དོན་གོ་ན་ལྟུང་བའོ།།
གནས་ངན་ལེན་བརྗོད་པ་ནི།རྟེན་ཡུལ་ནི་ཡང་ཞེས་དང་།སྦྱོར་བ་དམིགས་བསལ་ནི་བརྗོད་ན་ཞེས་ཏེ།རྟེན་ཁྱིམ་པ་མ་དད་པ་བཟློག་པའི་ཕྱིར་གནས་ངན་ལེན་བརྗོད་པར་མ་བསྐོས་པའི་དགེ་སློང་གིས།བརྗོད་པའི་ཡུལ་བྱུང་བ་དང་བཅས་པ་མི་ཤེས་པའི་བསྙེན་པར་མ་རྫོགས་པའི་གང་ཟག་ལ་བསྙེན་རྫོགས་ཀྱི་སྡོམ་པ་གསོ་རུང་ཡན་ཆད་དང་ལྡན་པའི་གནས་ངན་ལེན་བརྗོད་པས།སྦྱོར་བ་ཕམ་ལྷག་གང་རུང་གི་གནས་ངན་ལེན་སྨྲས་པ་མཐར་ཐུག་དོན་གོ་བ་ན་ལྟུང་བའོ།།
བླ་མ་བདེན་པར་སྨྲས་པ་ནི།རྟེན་ཡུལ་དང་བཅས་པ་ནི་ཡང་ཞེས་དང་།བརྗོད་བྱ་སྦྱོར་བ་དང་བཅས་པ་ནི་མིའི་ཆོས་ཏེ།རྟེན་དགེ་སློང་གིས་ཡུལ་མ་རྫོགས་པ་དང་།བདེན་པ་མ་མཐོང་བ་ལ་དངོས་པོ་རང་གིས་ཐོབ་པའི་སྒོམ་བྱུང་གི་ཡོན་ཏན་འདུ་ཤེས་མ་འཁྲུལ་ཞིང་ཀུན་སློང་དེ་སྨྲ་འདོད་ཀྱི་བསམ་པས་སྦྱོར་བ་རང་གིས་ཐོབ་པའི་ཆོས་བླ་མ་འདུ་ཤེས་མ་བསྒྱུར་བར་སྨྲས་ཏེ་མཐར་ཐུག་དོན་གོ་བ་ན་ལྟུང་བའོ།།
བཤེས་ངོར་བྱེད་པ་ནི།རྟེན་ཡུལ་དང་བཅས་པ་ནི་ཡང་ཞེས་དང་།སྦྱོར་བ་གཞི་བཅས་ནི་དེའི་འོག་ཏུ་ཞེས་ཏེ།རྟེན་དགེ་སློང་སྔ་ར་རྙེད་པ་དེའི་ཡུལ་ལ་བསྔོས་པ་ལ་དད་པས་ཕུལ་བ་ཡུལ་དགེ་འདུན་དངོས་པོ་ཟས་ལས་གཞན་པའི་རྙེད་པ་ཕལ་ཆེར་རུང་བ་ཚད་དང་ལྡན་པ་འདུ་ཤེས་མ་འཁྲུལ་ཞིང་ཀུན་སློང་འདུ་ཤེས་བསྒྱུར་ཏེ་སྐུར་པ་འདེབས་འདོད་ཀྱི་བསམ་པས་རྙེད་པ་སྦྱིན་པར་མི་རིགས་པ་ལ་བསྔོས་སོ་ཞེས་སྨྲས་ཏེ་མཐར་དོན་གོ་བ་ན་ལྟུང་བའོ།།
ཁྱད་དུ་གསོད་པ་དུས་དང་བཅས་པ་༼༣༥ན༽ནི་ཡང་ཞེས་དང་།སྦྱོར་བ་ནི་འདི་སྐད་ཅེས་ཏེ།རྟེན་དགེ་སློང་གིས་ཡུལ་དགེ་སློང་དག་ལ་གསོ་སྦྱོང་གི་དུས་སུ་འདུ་ཤེས་མ་འཁྲུལ་ཞིང་ཀུན་སློང་ཁྱད་དུ་གསོད་འདོད་ཀྱི་བསམ་པས།སྦྱོར་བ་བསླབ་པ་འདི་ལྟ་བུ་འདོན་པས་ཅི་ཞིག་བྱ་ཞེས་ཁྱད་དུ་གསོད་པའི་ཚིག་སྨྲས་ཏེ་མཐར་ཐུག་དོན་གོ་བའོ།།
བཅུ་ཚན་གཉིས་པ་ནི།སྡོམ་ལ།ས་བོན་འཕྱ་བ་བསྒོ་བ་དང་།།
ཁྲི་དང་གདིང་བ་བསྐྲོད་པ་དང་།།
ཕྱིས་གནོན་འབྱུང་བ་འདེབས་པ་དང་།།
རིམ་པ་གཉིས་སུ་བརྩིག་པའོ།།
ས་བོན་སྐྱེ་འཇིག་ལ་གཞི་ནི་ས་བོན་ཞེས་དང་།སྦྱོར་བ་ནི་འཇིག་གམ་ཞེས་སོགས་ཏེ།རྟེན་དགེ་སློང་གིས་དངོས་པོ་ནས་ལ་སོགས་ས་བོན་གང་རུང་མ་ཉམས་པ།རུང་བར་མ་བྱས་པ།རང་གི་ངོ་བོ་རྫོགས་པ་ལ།འདུ་ཤེས་ས་བོན་དང་སྐྱེ་བ་མ་ཉམས་པ་ལ་དེར་འདུ་ཤེས་པའམ་ཡིད་གཉིས་ཟ་བས།།
ཀུན་སློང་དེ་ཉམས་འདོད་ཀྱི་བསམ་པ་སྦྱོར་བ་རང་རྩས་བཅིངས་པའི་རྐྱེན་དང་རྫུ་འཕྲུལ་གྱིས་མིན་པར་རང་ངམ་གཞན་བསྐོས་པས་མངོན་སུམ་དུ་ཉམས་པར་བརྩམས་ཏེ་མཐར་ཐུག་ཉམས་པར་གྱུར་ན་ལྟུང་བའོ།།
སྦྱོར་བ་གཅིག་གིས་འབྲས་བུ་མང་པོ་ཉམས་པར་བྱེད་ན།སྦྱོར་བ་ནི་གཅིག་ཡིན་ལ་དངོས་གཞི་ནི་འབྲུའི་གྲངས་ཡིན་ནོ།།
ཤིང་སྡོང་ལྟ་བུ་དངོས་པོ་གཅིག་ལ་དངོས་གཞི་ནི་གཅིག་ཡིན་ལ་སྦྱོར་བ་ནི་བསྣུན་པའི་གྲངས་སོ།།
ཤིང་ལྟ་བུ་རྩ་ཐོན་དུ་བྱས་ཏེ་གཞན་དུ་བསྐྱེད་པ་དང་།ཉ་ལྕིབས་ཆུ་ནང་ནས་བཏོན་པ་ལྟ་བུ་དངོས་གཞིའོ།།
ཕ་བ་དགོ་དགོ་དང་།ཤ་མང་སོགས་དང་།གོ་སྙོད་སོགས་ལ་རླམ་པ་དང་།འདབ་མ་སྐྱ་བོ་ཁ་བྱེ་བ་དང་།བསྐུམ་པ་དང་།འབྲས་བུ་སྨིན་པ་བྲལ་བར་བྱས་པ་དང་།རྡོ་དྲིག་ཕྲུག་པ་དང་།ཚིག་གུ་རིལ་མེད་དུ་བྱེད་པ་དང་།སྐྱེ་བ་འཇོམས་པ་ལེགས་འགྱུར་དུ་སྨྲས་༼༣༥བ༽པ་རྣམས་ལ་ཉེས་བྱས་སོ།།
རུང་བར་བྱ་བ་ལ་མེ་སེན།ནེ་ཙོ།མཚོན་སོགས་ཀྱིས་རྨ་བྱུང་བ་དང་།འབྲས་བུ་སྨིན་པར་གྱུར་ཏེ་བསྐྱེད་མི་ནུས་པ་དང་།ལ་ཕུག་རྩ་ཕྱུང་དང་།སྲན་མ་ཕྱེད་ཚལ་དུ་བཀྲུམ་པ་དང་།ཤིང་སོགས་བཅད་པ་ལྟ་བུ་དང་།རླངས་པ་ལ་བདུག་པ་དང་།འབྲུའི་ཕུང་པོ་ལ་ཕྱོགས་གཉིས་གསུམ་ནས་རུང་བ་ལྟ་བུའི་སྐྱེ་བ་ལ་དགེ་སློང་གིས་བཅོམ་ཡང་འདིའི་སྐབས་ཀྱི་ལྟུང་བྱེད་མིན་ལ།དུས་རུང་མིན་པའི་སྨན་གསུམ་ལ་ཆུ་གྲང་མོ་གཏོར་ནས་རུང་བ་ནི་ཁོལ་བའི་དུས་སུ་མ་ཡིན་ནོ།།
འཕྱ་བ་ལ་འཕྱའམ་ཞེས་སོགས་ཏེ།རྟེན་དགེ་འདུན་གྱིས་གསོལ་བ་འབའ་ཞིག་པའི་ལས་ཀྱིས་དམན་པའི་གྲངས་སུ་བགྲངས་པའི་དགེ་སློང་གིས་ཡུལ་ལུང་ལས།གནས་ཁང་ཟས་ལ་བསྐོ་བ་གཉིས།།
ག་པ་བག་ཚོས་འགྲིམ་པ་གཉིས།།
ཕྲན་ཚེགས་འབྲིམ་པར་བྱེད་པ་དང་།།
སྣོད་སྤྱད་འབྲུབ་དང་གོས་ཀྱི་གཉིས།།
དབྱར་གྱི་རས་ཆེན་སྦེད་དང་འགྱེད།།
མངགས་གཞུག་པ་དང་མཛེས་ཆོས་ཏེ།།
གང་ཟས་བཅུ་དང་གཉིས་པོ་དག།སྟོན་པས་ཡང་དག་བཤད་པ་ཡིན།།
ཅེས་བསྐོས་པའམ་མ་བསྐོས་ཀྱང་ཞལ་ཏ་པ་ལ་ཀུན་སློང་འཕྱ་འདོད་ཀྱི་བསམ་པས་འདུ་ཤེས་བསྒྱུར་ཏེ།སྦྱོར་བ་བདག་ཉིད་དང་འབྲེལ་བའི་དོན་གྱིས་ཡུལ་དེས་ཐོབ་པ་མིང་ནས་སྨོས་ཏེ་གསལ་པོར་འཕྱ་བའམ།མ་སྨྲོས་པར་གཞོག་འཕྱས་བྱས་ཀྱང་རུང་།དོན་གོ་བ་ན་ལྟུང་བའོ།།
བསླབ་བྱ་ལ།གླེང་བ་དང་དུ་མི་ལེན་པ་ལ་དངོས་སུ་མི་གླེང་།རང་དང་ཞེ་འགྲས་པ་རང་ལས་སུ་མི་བསྐོའོ།།
བསྒོ་བ་རྣར་གཟོན་ལ་ཚིག་དོན་ནི་གོ་སླ་ལ།རྟེན་གཞན་གྱི་སྲོག་སྐྱོབ་པ་སོགས་དགོས་པ་ཁྱད་པར་ཅན་དང་མི་ལྡན་པའི་དགེ་སློང་གིས།དགེ་སློང་ཕ་རོལ་པོས་ཆོས་༼༣༦ན༽མཐུན་གྱིས་དྲིས་པ་ལ་དགེ་སློང་རྣལ་གཟོན་འདོད་ཀྱི་བསམ་པས།སྦྱོར་བ་ལན་ལོག་འདེབས་སྨྲ་བར་བརྩམ་སྟེ་མཐར་ཐུག་དོན་གོ་བ་ན་ལྟུང་བའོ།།
ལན་མི་སྨྲ་བ་དང་།མི་དྲན་ཟེར་བ་ཉེས་བྱས་སོ།།
བསད་བྱ་མཐོང་ངམ་ཞེས་འདྲི་བ་ལ།རེ་ཞིག་མ་འདྲི་ཞིག་ཅེས་སོགས་དང་།བཏགས་པའི་བདག་ལ་བསམ་ནས་བསད་བྱ་མ་མཐོང་ངོ་ཞེས་སྨྲས་པ་ལ་ལྟུང་བ་མེད་དོ།།
བསླབ་བྱ་ལ།ཆེ་བཞི་སར་མི་བསྡད་ཅིང་སྡོད་ནའང་གནོད་པ་མི་འགུག་པའི་དཔང་པོར་བྱའོ།།
གནས་མལ་ལ་རྟེན་གཞི་ནི་ཡང་ཞེས་དང་།སྦྱོར་བ་དམིགས་བསལ་ནི་དེ་ནས་ཞེས་སོགས་ཏེ།རྟེན་དགེ་སློང་གིས་དགེ་འདུན་གྱིས་གནས་མལ་ལ་ལོངས་སྤྱོད་ནས་བླ་གབ་མེད་པར་རང་གིས་མ་བསྡུས་པའམ།གཞན་སྡུད་དུ་མ་བཅུག་པར་རང་གར་འདོར་འདོད་ཀྱི་བསམ་པས་སྦྱོར་བ་དེ་ལྟར་བཞག་ཅིང་།དེ་ཉིད་དུ་འདུག་པའམ་འགྲོ་བར་བརྩམ་པ།རྐྱེན་དེས་ཕན་ཕུན་དུ་གྱུར་ཏམ་མ་གྱུར་ཀྱང་།གནས་འདོམ་ཞེ་དགུ་འདས་པར་ཕྱིན་ན་ལྟུང་བའོ།།
གང་ཟག་གི་ལ་ཉེས་བྱས་སོ།།
ཕན་ཕུན་ནི་གསུམ་སྟེ།རླུང་གིས་བཟློག་པ་དང་།ཆར་པས་རིམ་པ་གཞན་ཕིག་པ་དང་།སྲིན་བུ་ལ་སོགས་པས་ཀྱང་ངོ་།།
གདིང་བ་ལ་རྟེན་གཞི་ནི་ཡང་དང་།སྦྱོར་བ་དམིགས་བསལ་ནི་དེ་ནས་ཞེས་ཏེ།རྟེན་དགེ་སློང་གིས་གནས་གཙུག་ལག་ཁང་དུ་སྲོག་ཆགས་ཕྲ་མོ་སྐྱེ་བའི་སར་རྩ་དང་ལོ་མ་ལ་སོགས་ཀྱི་གདིང་བ་བཏིང་བ་དེ།བསམ་སྦྱོར་མཐར་ཐུག་སྔ་མ་དང་འདྲ།བསླབ་བྱ་ལ།དགོན་པར་རྩ་དང་ལོ་མ་བཏིང་བ་དོར་བའམ།སྟེང་འོག་བསྒྱུར་བར་བྱ།ཁྱིམ་གཞན་དུ་བཏིང་བའི་ཚེ་ཁྱིམ་བདག་ལ་དྲིས་ནས་འདོར་བར་༼༣༦བ༽བྱ།ལྕི་བ་དང་ཤིང་ལ་སོགས་པ་སྲོག་ཆགས་སྐྱེ་བའི་སར་མི་བཞག།འཆག་སར་བཏིང་བ་དང་།གོས་སྐ་མ་པའི་ཕྱིར་བཏིང་བ་མ་དོར་ན་ཉེས་བྱས་སོ།།
བསྐྲད་པ་ལ་རྟེན་བསམ་པ་ནི་ཡང་ཞེས་དང་།སྦྱོར་བ་དམིགས་བསལ་ནི་བསྐྲོད་དམ་ཞེས་སོགས་ཏེ།རྟེན་དགེ་སློང་གིས་གནས་གཙུག་ལག་ཁང་ནས་དགེ་སློང་ཕ་རོལ་པོ་རང་གར་སྐྲོད་འདོད་ཀྱིས་སྦྱོར་བ་དེ་ལས་གནོད་པ་བསལ་བའམ།དགེ་འདུན་འཁྲུགས་པ་ཞི་བའི་ཕྱིར་སོགས་མིན་པར་རང་ངམ་བསྐོས་པས་སྐྲོད་པར་བརྩམས་ཏེ།རྐྱེན་དེས་གཙུག་ལག་ཁང་ཉེ་འཁོར་དང་བཅས་པ་ལས་འདས་ན་ལྟུང་བའོ།།
གང་ཟག་གི་གཙུག་ལག་ཁང་དང་།ཁྱིམ་པའི་གནས་ནས་དང་།བཞད་གད་ཙམ་གྱི་ཕྱིར་དང་།ཉེ་འཁོར་ལས་མ་འདས་ཙམ་དུ་སྐྲོད་པ་ཉེས་བྱས་སོ།།
ཕྱིས་གནོན་ལས་འདས་ལྟུང་བའོ།།
རྟེན་དང་གཞི་ནི།ཡང་དགེ་སློང་ཞེས་དང་།འདུ་ཤེས་སྦྱོར་བ་ནི་ཤེས་བཞིན་དུ་ཞེས་ཏེ།རྟེན་དགེ་སློང་གིས་གནས་དགེ་འདུན་གྱི་གཙུག་ལག་ཁང་དུ་དགེ་སློང་སྔ་ར་ཞུགས་ལ་ཀུན་སློང་ཐོ་འཚམས་པས་སྦྱོར་བ་ནི་འཇིགས་པའི་དབང་མིན་པར་ལུས་ངག་གང་རུང་གིས་ཕྱིས་གནོན་དུ་བརྩམ་སྟེ།དེ་ཟིལ་གྱིས་མནན་ན་ལྟུང་བའོ།།
རྩ་བ་དབྱུང་བ་ལ།རྟེན་གཞི་ཡང་དགེ་སློང་ཞེས་དང་།འདུ་ཤེས་སྦྱོར་བ་ནི་ཤེས་བཞིན་དུ་ཞེས་ཏེ།རྟེན་དགེ་སློང་གིས་དགེ་འདུན་གྱི་གཙུག་ལག་ཁང་གི་ཐོག་བརྡོལ་བའི་ཉེས་བྱས་ལ་ཁྲིའམ་ཁྲིའུའི་རྩ་བ་རྣོན་པོ་རྐང་རྟེན་མེད་པར་སྦྱོར་བ་དེ་ལ་འདུག་ཅིང་ཉལ་བའི་བྱ་བ་རྫོགས་པ་ན་ལྟུང་བའོ།།
འདེབས་པ་ལ་རྟེན་བསམ་པ་ནི།ཡང་དགེ་སློང་དང་།གཞི་སྦྱོར་ནི་སྲོག་ཆགས་ཞེས་ཏེ།རྟེན་དགེ་སློང་གིས་ཆུ་དང་རྩ་ཤིང་སོགས་སྲོག་༼༣༧ན༽ཆགས་སྣང་བཞིན་དུ་དེར་ཤེས་ཏེ་རང་དོན་དུ་ལོངས་སྤྱོད་ཀྱི་བསམ་པས་སྦྱོར་བ་རང་ངམ་བསྐོས་པས་བརྩམས་ཏེ་རྐྱེན་དེས་སྲོག་ཆགས་ཇི་སྙེད་ཤི་བ་དེ་སྙེད་ཀྱི་ལྟུང་བའོ།།
རིམ་གཉིས་སུ་བརྩིགས་པ་ལ།རྟེན་གནང་པའི་ཚད་ནི་ཡང་དགེ་སློང་ཞེས་དང་།ཚད་འདས་ནི།དེ་ལས་ལྷག་ན་ཞེས་ཏེ།དགེ་སློང་གིས་སྤྱོད་ལམ་བཞི་ཤོང་ཡན་ཆད་ཀྱི་གཙུག་ལག་ཁང་དེ་ཉིད་དང་ཉི་མ་དེ་ཉིད་དང་།གཞན་ལ་ཡང་འཇིམ་པ་མེད་པར་ཕ་གུ་རིམ་པ་གསུམ་ལས་ལྷག་པར་བརྩིགས།ཆུ་ཁུང་མ་བཏོད།རྨང་བསྐོས་ཏེ་མ་བཙུགས་པར་སྒོ་གླེགས་གོང་མ་མ་བཅུག་པ་ན།སྦྱོར་བ་སྦྱིན་བདག་གི་རིངས་རྐྱེན་མེད་པར་རང་ངམ་བསྐོས་པས་བརྩམས་ཏེ་རིམ་པ་ལྷག་སྟེ་མྱུར་དུ་འཇིག་ཉེན་ལྟུང་བའོ།།
བཅུ་ཚན་གསུམ་པ་ནི།སྡོམ་ལ།མ་བསྒོས་ཉི་མ་ནུབ་པ་དང་།།
ཟས་དང་ཆོས་གོས་གཉིས་དག་དང་།།
དོན་མཐུན་གྲུ་དང་དབེན་པ་གཉིས།།
དགེ་སློང་མ་ཡིས་སྦྱོར་བཅུག་པའོ།།
ཞེས་པ་ལས།མ་བསྐོས་པར་སྟོན་པ་ལ་རྟེན་ཡུལ་ནི།ཡང་ཞེས་དང་།སྦྱོར་བ་དམིགས་བསལ་ནི་སྟོན་ཅེས་ཏེ།འདི་ཕྱིན་ཆད་རྟེན་གཞིའི་ཡན་ལག་དོན་གྱིས་གོ་བར་བྱས་ཏེ་མ་སྨོས་པ་ཡིན་ལ།དེས་རྟེན་མི་ཆོས་བླ་མའི་མཐུ་དང་མི་ལྡན་ཅིང་།དགེ་སློང་མའི་སྟོན་པར་གསོལ་བ་མ་བཏབ་མ་བསྐོས།བསྐོས་ཀྱང་མཚན་ཉིད་མ་ཚང་བའི་དགེ་སློང་གིས་སྦྱོར་བ་དམ་ཆོས་བསྟན་ན་དོན་གོ་བ་ན་དངོས་གཞིའོ།།
ཉི་མ་མ་ནུབ་ཀྱི་བར་དུ་སྟོན་པ་ལ་རྟེན་གཞི་ནི།དགེ་སློང་ཞེས་དང་།སྦྱོར་བ་མཚན་ཉིད་ནི་སྟོན་ན་ཞེས་ཏེ།ཡུལ་དགེ་སློང་མའི་སྟོན་པར་བསྐོས་ཀྱང་དགེ་སློང་མ་ལ་ཉི་མ་ནུབ་ཀྱི་བར་དུ་སྟོན་ན།མཐར་ཐུག་༼༣༧བ༽དོན་གོ་ན་དངོས་གཞིའོ།།
ཟས་ཅུང་ཟད་ཀྱི་ཕྱིར་སྟོན་པ་ལ་རྟེན་གཞི་ནི་དགེ་ཞེས་དང་།སྦྱོར་བ་མཚན་ཉིད་ནི་སྟོན་ཏོ་ཞེས་ཏེ།དགེ་སློང་ཕ་རོལ་པོ་ཟས་གོས་ཀྱི་ཕྱིར་ཆོས་སྟོན་པ་མ་ཡིན་པ་ལ།འདུ་ཤེས་བསྒྱུར་ཏེ་སྐུར་པ་བཏབ་འདོད་ཀྱིས་སྦྱོར་བ་ཟས་ཙམ་གྱི་ཕྱིར་ཆོས་སྟོན་ཏོ།།
ཞེས་མིང་ནས་སྨོས་ཏེ་སྐུར་པ་འདེབས་པ་ཙམ་དོན་གོ་བ་ན་ལྟུང་བའོ།།
གོས་བྱིན་པ་ལ།རྟེན་གཞི་དང་བཅས་པ་ནི།ཡང་དགེ་སློང་གང་།སྦྱོར་བ་ནི་སྦྱིན་ན་ཞེས་ཏེ།དགེ་སློང་མའི་དགེ་འདུན་ལ་གོས་འབུལ་བ་དང་།ཕོག་པ་ལ་སྦྱིན་པ་མ་གཏོགས་པར་དགེ་སློང་མ་ཉེ་དུ་མིན་པ་ལ་མཛའ་བཤེས་ཀྱི་ནོར་སྟེར་འདོད་ཀྱི་བསམ་པས་སྦྱོར་བ་བརྩམས་ཏེ་ཡུལ་གྱིས་གོས་ཐོབ་ན་ལྟུང་བའོ།།
གོས་བྱེད་པ་ལ་རྟེན་ཡུལ་ནི་ཡང་ཞེས་དང་།སྦྱོར་བ་གོས་བྱེད་ན་ཞེས་ཏེ།དགེ་སློང་མ་ཉེ་དུ་མིན་པའི་གོས་ཀྱི་བཟོ་རང་གར་བཟོ་འདོད་ཀྱི་བསམ་པས་མཐར་ཐུག་བཟོ་རྫོགས་ན་ལྟུང་བའོ།།
དགེ་སློང་མ་དང་ལྷན་གཅིག་ལམ་དུ་འགྲོ་བ་ནི།རྟེན་གཞི་ནི་ཡང་།སྦྱོར་བ་དམིགས་བསལ་ནི་འགྲོ་ན་ཞེས་སོགས་ཏེ།རྟེན་དགེ་སློང་ན་བ་སོགས་ཀྱི་རྐྱེན་མེད་པར་དགེ་སློང་མ་ཉེ་དུ་མིན་པ་དང་སའི་ལམ་ལ་རྒྱང་གྲགས་ལས་འདས་པར་འགྲོ་ན།མཐར་ཐུག་རྒྱང་གྲགས་རེ་འདས་པ་ན་ལྟུང་བ་རེ་རེ།རྒྱང་གྲགས་ཕྱེད་ཕྱེད་ན་ཉེས་བྱས་རེ་ཡིན་ལ།དགེ་སློང་མ་དང་ལྷན་གཅིག་གྲུ་ལ་འཇུག་ན་རྟེན་གཞི་ནི་ཡང་དགེ་སློང་དང་།སྦྱོར་བ་དམིགས་བསལ་ནི་གྱེན་དུ་ཞེས་ཏེ་ཆུ་ལ་ཐད་ཀར་འགྲོ་བ་དང་།གྲུ་ཡོབ་དང་སྟིབ་ཆད་སོགས་རྐྱེན་དང་ཁྲིམས་གྲོགས་མེད་པར་རྒྱུན་ནམ་རྒྱུན་ལས་བཟློག་སྟེ་སྔ་མ་དང་འདྲའོ།།
དབེན་པ་ན་འདུག་པ་ལ།རྟེན་༼༣༨ན༽དང་གཞི་ནི་ཡང་ཞེས་དང་།སྦྱོར་བ་ལ་སྟན་ཞེས་ཏེ།ཡུལ་བུད་མེད་ཉེ་དུ་མིན་པ།དབེན་པ་སྐྱབས་ཡོད་འདོམ་གང་གི་བར་དུ་ཁྲིམས་གྲོགས་མེད་པར་ཡུལ་རྟེན་གཉིས་ཀ་སྤྱོད་ལམ་རྫོགས་པའི་བར་དུ་འདུག་ན་ལྟུང་བའོ།།
འགྲེང་བ་ལ་རྟེན་གཞི་ནི་ཡང་ཞེས་དང་།སྦྱོར་བ་ནི་འགྲེང་ན་ཞེས་ཏེ་ཡན་ལག་སྔ་མ་བཞིན་ལས་འགྲེང་བ་ནི་ཁྱད་པར་རོ།།
དགེ་སློང་མ་སྦྱོར་དུ་བཅུག་པ་ནི་རྟེན་འདུ་ཤེས་ནི་ཡང་ཞེས་དང་།གཞི་སྦྱོར་བ་ནི་དགེ་སློང་མས་ཞེས་ཏེ།དགེ་སློང་མ་ཉེ་དུ་མིན་པས་སྦྱིན་བདག་ཁྱིམ་པ་ལ་རང་མངོན་རྟོགས་སོགས་ཀྱི་ཡོན་ཏན་མི་ལྡན་པ་ལ་ལྡན་ཅེས་རྫུན་གྱིས་དུས་རུང་གི་ཟས་སྦྱོར་བཅུག་པ་ཀུན་སློང་དགེ་སློང་མས་ཡང་དག་མིན་པའི་ཡོན་ཏན་གྱི་སྒོ་ནས་སྦྱོར་བཅུག་པ་ཟ་འདོད་ཀྱིས་མཐར་ཐུག་མགུལ་དུ་མིད་པ་ན་ལྟུང་བའོ།།
སྡོམ་ལ།ཡང་ཡང་དང་ནི་འདུག་གནས་གཅིག།ཕྱེ་དང་བཅས་དང་སྟོབས་པ་དང་།།
འདུས་དང་དུས་མིན་གསོག་འཇོག་དང་།།
ཁ་ནས་མིད་དང་བསོད་པ་ཉིད།།
ཅེས་པའི་ཡང་ཡང་ཟ་བ་ལ་ལྟུང་བ་དམིགས་བསལ་ནི་ཡང་ཡང་ཞེས་དང་།གནང་བའི་དུས་ནི་དེ་ལ་ཞེས་ཏེ།ན་བ་དང་།ཕྱགས་དར་བ་མལ་ཙམ་དང་།དཔག་ཚད་ཕྱེད་ཕྱིན་པ་མིན་ཅིང་སྲ་བརྐྱང་གི་དུས་མིན་པ་གཅིག་ལ་མགྲོན་དུ་བོས་པ་གཉིས་ལས་ཕྱི་མར་ཁྲུ་གང་དུ་ལོངས་པའི་གོས་རྙེད་པ་མིན་པར་བཟའ་བ་ལྔ་དང་བཅའ་བ་ལྔའི་ཁོངས་སུ་གཏོགས་པའི་དུས་རུང་གི་ཟས་ཚད་ལོངས།སྦྱོར་བ་མུ་གེའི་དུས་མིན་པར་བརྩམས་ཏེ་མགུལ་དུ་མིད་པ་ན་ལྟུང་བའོ།།
བསླབ་བྱ་ནི་མགྲོན་ལ་སྔ་ཚོམས་སུ་མི་འཇུག།རང་འཁོར་ལ་བརྟགས་ཏེ་སྤྱོད་ལམ་མཛེས་པར་འཆོས།༼༣༨བ༽གྱ་ཚོམས་སུ་རུང་གི་ཟན་མི་བཅད་དོ།།
འདུག་གནས་གཅིག་ཏུ་ཟ་བ་ལ།རྟེན་གནང་བའི་ཚད་ནི་འདུག་ཅེས་དང་།འདས་པ་ནི་དེ་ལས་ཞེས་ཏེ།རྟེན་དགེ་སློང་མིན་པས་མུ་སྟེགས་ཅན་ཤ་སྟག་གི་གནས་སུ་མུ་སྟེགས་བྱེད་ཀྱི་སྦྱིན་བདག་ཉེ་དུ་མིན་པས་ཅི་བདེར་མ་བསྟབ་བཞིན་དུ་ཀུན་སློང་ཞག་ལོན་པའི་ཟས་ཟ་འདོད་ཀྱི་བསམ་པས་སྦྱོར་བ་ཟས་གཉིས་པ་ཟ་བར་བརྩམས་ཏེ་མགུལ་དུ་མིད་ན་ལྟུང་བའོ།།
ལྷུང་བཟེད་དོ་གསུམ་ལས་ལྷག་པར་ལེན་པ་ལ།བསླང་དུ་གནང་བའི་ཚད་ནི་དགེ་སློང་ཞེས་དང་།འདས་པ་ནི་དེ་ལས་ཞེས་དང་།དེ་ལས་ལྷག་པར་བསླངས་ནས་ཅི་ལྟར་བྱ་ན།ལྷུང་བཟེད་གང་བ་ཞེས་སོགས་ཏེ།སྦྱིན་བདག་ཁྱིམ་བ་ཟས་ཅི་བདེར་སྟོབ་པ་མིན་པ་ལ།དུས་རུང་ལས་སུ་བྱས་པ་ལྷུང་བཟེད་ཆུང་ཚད་གསུམ་འབྲིང་ཚད་དོ།།
ཆེ་ཚད་གང་ལས་ལྷག་པ་གནས་དེ་ལས་གཞན་དུ་ཁྱེར་ཏེ་ཟ་བར་བརྩམས་ཏེ་མགུལ་དུ་མིད་པ་ན་ལྟུང་བའོ།།
གཞན་གྱིས་ལེན་པ་དང་།སྨན་གཞན་གསུམ་ལས་དེ་ལྟར་ཉེས་བྱས་སོ།།
གནས་དེ་ཉིད་དུ་ལྷག་པ་ཟོས་པ་དང་།གཡོས་སུ་མ་བྱས་ལྷག་པར་བླངས་ཏེ་ཟོས་པ་ལ་ལྟུང་བ་མེད་དོ།།
སྤངས་པ་ཟ་བ་ལ་རྟེན་གཞི་ནི་ཡང་ཞེས་དང་།སྦྱོར་བའི་མཚན་ཉིད་ནི་འཆའམ་ཟ་ན་ཞེས་ཏེ།རྟེན་དགེ་སློང་ནད་པ་མིན་པས་བཟའ་བཅའི་ཁོངས་གཏོགས་དུས་རུང་གི་ཟས་ཐུག་པ་དང་སྐྱོ་མ་མིན་པ།དེ་རིང་ད་ནི་མི་ཟའོ་སྙམ་ནས་སྤངས་པ་རྫོགས་པ།ལྷག་པོར་བྱིན་གྱིས་མ་བརླབས་པ་སྦྱོར་བ་མུ་གེའི་དུས་མིན་པར་མགུལ་དུ་མིད་ན་ལྟུང་བའོ།།
སྨན་གཞན་གསུམ་དང་།ཁ་གཟར་གྱེན་དུ་མི་འགྲེང་པའི་ཐུག་པ་དང་༼༣༩ན༽སོར་མོའི་རྗེས་མི་མངོན་པའི་སྐྱོ་མའི་ལྟུང་བ་རྣམས་ལ་སྤང་བྱའི་ལྟུང་བ་མི་འབྱུང་ལ།བཀྲེས་པ་སོགས་ཀྱིས་སྤངས་པ་ནན་གྱིས་ཟ་ན་ལྷག་པོར་བྱིན་གྱིས་བརླབས་ཏེ་ཟའོ།།
སྤངས་པ་སྟོབ་པ་ལ།རྟེན་བསམ་པ་ནི་སྤང་དང་།ཡུལ་ཕྱེད་ནི་དགེ་སློང་དང་།སྦྱོར་བ་ནི་ཚེ་དང་ལྡན་པ་ཞེས་ཏེ།མུ་གེའི་དུས་མ་ཡིན་པ་དུས་རུང་གི་ཟས་ཚད་ལྡན་དགེ་སློང་གིས་ལྷག་པོར་མ་བྱས་པའི་ཟས་སྟོབ་འདོད་ཀྱི་བསམ་པས་ལྷག་པར་བྱས་ཏེ་སྟོབ་པར་བརྩམས་ཏེ།ཡུལ་དགེ་སློང་གིས་ཟོས་ན་སྟོབ་པ་པོ་ལ་ལྟུང་བའོ།།
དགེ་སློང་ལ་ཆང་དང་དགོང་ལྟོ་ཟར་འཇུག་པ་ནི་སྐབས་འདིའི་ཉེས་བྱས་སོ།།
འདུས་ཤིང་ཟ་བ་ལ་དངོས་དམིགས་བསལ་ནི།འདུས་ཤིང་ཞེས་དང་།གནང་བའི་དུས་ནི་དེ་ལས་ཞེས་ཏེ།འདུས་པ་ཆེན་པོའི་དུས་མིན་པར་མཚམས་ནང་གཅིག་ཏུ་དགེ་འདུན་སྤྱི་ལས་ལོགས་སུ་དགེ་སློང་གསུམ་ཡན་ཆད་ལྷན་ཅིག་དུས་རུང་གི་ཟས་ཚད་ལྡན་ཟ་བར་བརྩམས་ཏེ་མིད་པ་ན་ལྟུང་བའོ།།
ན་བ་དང་།ལས་བྱས་པ་དང་།སྲ་བརྐྱང་བཏིང་བ་ལ་འདི་མི་འགྱུར་རོ།།
དུས་མིན་པར་ཟ་བ་ལ་རྟེན་བཀག་པའི་དུས་ནི།ཡང་ཞེས་དང་།གཞི་སྦྱོར་བ་ནི་བཅའམ་ཞེས་སོགས་ཏེ།ན་བ་སོགས་རྐྱེན་མེད་པར་དུས་རུང་གི་ཟས་རང་གླིང་གི་ཉི་མ་ཕྱེད་ཡོལ་ནས་རྐྱ་རེངས་དང་པོ་མ་ཤར་གྱི་བར་སྦྱོར་བ་བརྩམས་ཏེ་ཟོས་ན་ཁམ་རེ་ལ་ལྟུང་བ་རེའོ།།
གསོག་འཇོག་ཟ་བའི་རྟེན་གཞི་ནི།ཡང་དང་།སྦྱོར་བའི་མཚན་ཉིད་ནི།འཆའམ་ཞེས་ཏེ།ན་བ་སོགས་རྐྱེན་མེད་པར་སྨན་བཞི་པོ་གང་རུང་བྱིན་ལེན་བྱས་ཤིང་གསོག་འཇོག་བྱས་ཏེ།མ་ཞིག་པར་མུ་༼༣༩བ༽གེའི་དུས་མིན་པར་ཟ་བར་བརྩམས་ཏེ་མགུལ་དུ་མིད་ན་ལྟུང་བའོ།།
འདི་ལས་འཕྲོས་པའི་ལག་ཉ་ནི་ཐོག་ཤས་བགོད་པ་དང་།སྣོད་ནས་འཁྲུད་པ་དང་།ནོར་བ་དང་།བརྗེད་པ་དང་།ཆུད་མི་ཟ་བའི་རྐྱེན་མེད་པར་མྱུར་དུ་ལོངས་སྤྱོད་པའི་ཟས་སམ།འབྲུ་སོགས་མ་བྱིན་ལེན་གྱི་ཆད་མིན་པར་རེག་ན་ལག་ཉ།ཁྱིམ་པའི་གནས་དང་།རུང་ཁང་མིན་པར་དགེ་སློང་རང་དབང་བའི་མཚམས་དངོས་སམ།ཉེ་འཁོར་གྱི་ནང་དུ་འབྲུ་སོགས་རྗེན་པ་འཚོས་པར་མཚམས་བཙོས།བཞག་མའི་གནས་དང་འཇོག་པའི་དངོས་པོ་སྔ་མ་བཞིན་ལ་རྗེན་པ་མ་བཙོས་ཀྱང་ཞག་གཅིག་འདས་ནས་ཞག་ལོན།ན་བའི་རྐྱེན་མེད་པར་འབྲུ་སོགས་དགེ་སློང་གིས་མཚམས་ཕྱི་ནང་གང་དུ་བཙོས་ཀྱང་དགེ་སློང་གིས་བཙོས་པར་འགྱུར་རོ།།
ཁ་དྲི་མ་ཅན་གྱིས་ཟོས་ན་ཉེས་བྱས་སོ།།
བྱིན་ལེན་མ་བྱས་པར་ཟ་བ་ལ།།