༄༅།། ངེས་ཤེས་རིན་པོ་ཆེའི་སྒྲོན་མེ་བཞུགས་སོ།

༄༅།།ངེས་ཤེས་རིན་པོ་ཆེའི་སྒྲོན་མེ་བཞུགས་སོ།།

༄༅།།གང་ཡིད་ཐེ་ཚོམ་དྲྭ་བའི་སྦུབས་འཐུམས་པ།།འབྱེད་བྱེད་འཇམ་དཔལ་རྡོ་རྗེའི་མར་མེ་ནི།།སྙིང་ལ་ངེས་ཤེས་ཟབ་མོའི་ཚུལ་འཇུག་པ།།ལམ་བཟང་མཐོང་བའི་མིག་དེར་བདག་ཀྱང་དད།།ཀྱེ་མ་ཟབ་མོའི་གནས་ལུགས་ལ།།སྦྱོར་བྱེད་ངེས་ཤེས་རིན་པོ་ཆེ།།ཁྱོད་མེད་པས་ན་སྲིད་པ་འདིར།།སྒྱུ་མའི་རྒྱར་ནི་འཐུམས་ཤིང་རྨོངས།།གཞི་ལམ་འབྲས་བུའི་ཆོས་རྣམས་ལ།།ངེས་པས་ཡིད་ཆེས་འདྲོང་བ་དང་།།ཐོས་པས་དད་པར་བྱེད་པ་གཉིས།།ལམ་དང་དེ་ཡི་གཟུགས་བརྙན་བཞིན།།རྨད་བྱུང་ཆོས་ཀྱི་ཟླ་བའི་གྲགས་པ་ནི།།ལེགས་བཤད་གསུང་གི་འོད་དང་ཆབ་ཅིག་པར།།ཐུབ་བསྟན་ལྷ་ལམ་ཡངས་པོར་ཤར་བ་ཡིས།།ཐེ་ཚོམ་མུན་པ་ཐིབས་པོ་རྣམ་པར་འཇོམས།།ཐ་སྙད་དཔྱོད་པའི་ཚད་མ་ཡིས།།བླང་དོར་འཇུག་ལྡོག་མི་ནོར་ཞིང་།།ཁྱད་པར་བསྟན་དང་སྟོན་པ་ལ།།ཡིད་ཆེས་རྙེད་པའི་སྒོ་གཅིག་པུ།།ཚད་མའི་གཞུང་དང་གནས་ལུགས་དོན།།གཏན་འབེབས་དོན་དམ་རིག་ཤེས་ཀྱི།།ཚད་མ་དྲི་མེད་གསལ་བྱེད་པ།།ཐེག་མཆོག་དབུ་མ་རྣམ་པ་གཉིས།།ལེགས་པར་སྦྱངས་པའི་བློ་མིག་ཟུང་།།བགྲད་དེ་སྟོན་པས་བསྟན་པའི་ལམ།།དེར་ནི་གཞན་དྲིང་མི་འཇོག་པར།།ཡང་དག་ཞུགས་པ་དེ་ལ་བསྔགས།།དེ་ལྟར་སེམས་པའི་དྲང་སྲོང་ལ།།ཐོལ་བྱུང་ལྡོམ་བུ་པ་ཞིག་གིས།།རྟོག་གེའི་བརྒལ་བརྟག་བྱ་བའི་ཕྱིར།།དྲི་བ་བདུན་པོ་འདི་ལྟར་དྲིས།།གཞན་གྱི་རྗེས་སུ་ཟློས་ལ་མཁས་པས་ཅི།།རང་གི་རྣམ་པར་དཔྱོད་པ་བག་ཕོབ་ལ།།དྲིས་པའི་ལན་འདི་ཉེ་བར་ལྡོན་མཛོད་དང་།།ནང་གི་རྣམ་དཔྱོད་མཐོང་བ་བཞིན་དུ་གསལ།།མང་ཐོས་སྣ་ཞགས་རིང་དུ་བརྐྱངས་ན་ཡང་།།ཁྲོན་པའི་ཆུ་ལྟར་ཟབ་པའི་ཆོས་ཀྱི་ཆུ།།མ་མྱོང་ད་དུང་མཁས་པའི་གྲགས་པ་ལ།།རེ་བ་རིགས་ངན་བཙུན་མོར་ཆགས་དང་འདྲ།།ལྟ་བ་དགག་གཉིས་གང་ལྟར་སྨྲ།།ཉན་རང་བདག་མེད་གཉིས་རྟོགས་སམ།།མཉམ་བཞག་འཛིན་སྟངས་ཡོད་དམ་མེད།།དཔྱད་ནས་བསྒོམ་མམ་བཞག་ནས་བསྒོམ།།བདེན་པ་གཉིས་ལས་གང་ཞིག་གཙོ།།མི་གཅིག་མཐུན་སྣང་བལྟ་བྱ་གང་།།དབུ་མར་ཁས་ལེན་ཡོད་དམ་མེད།།དེ་སྐད་སྟོང་ཉིད་ལས་བརྩམས་པའི།།ཟབ་མོའི་དྲི་བ་བདུན་པོ་འདིར།།ལུང་དང་འགལ་བ་མེད་བཞིན་དུ།།རིགས་པས་གྲུབ་པའི་ལན་ཐོངས་ཤིག།རྟོག་གེའི་ཚིག་ཕྲེང་ཚེར་མའི་མདུང་།།འབུམ་གྱིས་བསྣུན་ཀྱང་མི་ཕིག་པ།།ཆེ་རྣམས་རྨོངས་པའི་དཀའ་གནད་ལ།།སྨྲ་བའི་ལྗགས་རིང་གློག་བཞིན་སྐྱོངས།།དེ་ལྟར་བློ་གྲོས་ཀྱིས་བསྐུལ་ངག་གི་རླུང་།།ཆུང་ངུར་གཡོས་པ་དེས་ཀྱང་དྲང་སྲོང་སྙིང་།།དུས་མཐའི་རླུང་གིས་རི་བཞིན་བསྒུལ་གྱུར་ནས།།མི་སྨྲའི་བརྟུལ་ཞུགས་དལ་གཅིག་བཟུང་བའི་མཐར།།ཀྱེ་མ་བརྒྱ་ཕྲག་དཀའ་བའི་ཁུར་བསྟེན་ཅིང་།།ཡང་དང་ཡང་དཔྱད་བློ་གྲོས་རྣོན་པོའི་མེ།།རྒྱུད་མར་ཆེས་ཆེར་སྦར་བ་དེས་ཀྱང་འདི།།སྐྱོན་བྲལ་ཁམས་སུ་བསྒྲུབ་པར་མ་ནུས་ན།།ལྷན་སྐྱེས་སྤོབས་པའི་བློ་ནུས་ཞན་གྱུར་ཅིང་།།ཡུན་རིང་སྦྱང་བའི་ཁུར་ཀྱང་མ་བཟུང་བ།།དམན་པ་བདག་གིས་སྨྲ་བ་ག་ལ་ཞེས།།འཇམ་པའི་དབྱངས་ལ་གདུང་བའི་ཤུགས་ཀྱིས་བོས།།དེ་ཚེ་དེ་ཡི་མཐུ་ལས་ཡིན་སྙམ་པའི།།ཡིད་ལ་ཐོ་རངས་དུས་ཀྱི་སྣང་བ་ལྟར།།སྤོབས་པའི་གོ་སྐབས་ཅུང་ཟད་ཐོབ་པའི་འཕྲལ།།ལེགས་གསུངས་དོན་བཞིན་རིགས་པས་དཔྱད་དེ་སྨྲས།༈།དགེ་ལྡན་ལྟ་བ་མེད་དགག་ཟེར།།གཞན་རྣམས་མ་ཡིན་དགག་ཏུ་སྨྲ།།སྔ་འགྱུར་རང་ལུགས་གང་ཞེ་ན།།ཟུང་འཇུག་ཡེ་ཤེས་ཆེན་པོའི་ངོར།།མེད་ཅེས་དགག་བྱ་བཀག་ཤུལ་གྱི།།མེད་རྐྱང་དང་ནི་མ་ཡིན་ཞེས།།བཀག་ཤུལ་ཆོས་གཞན་ཅི་ཞིག་འཕེན།།དེ་གཉིས་བློ་ཡིས་བརྟག་པ་ཙམ།།དོན་ལ་གཉིས་ཀར་ཁས་མི་ལེན།།དགག་སྒྲུབ་གཉིས་དང་བྲལ་བ་ཡི།།བློ་འདས་གདོད་མའི་ཆོས་ཉིད་ཡིན།།སྟོང་ཚུལ་ཁོ་ནར་བསམ་ནས་ནི།།དྲི་ན་མེད་དགག་ཉིད་ཡིན་ཏེ།།འཕགས་ཡུལ་དཔལ་ལྡན་ཟླ་བ་དང་།།བོད་ན་རོང་ཟོམ་ཆོས་བཟང་གཉིས།།དགོངས་པ་གཅིག་དང་དབྱངས་གཅིག་གིས།།ཀ་དག་སྟོང་པ་ཆེན་པོ་བསྒྲུབས།།ཆོས་འདི་ཀ་ནས་དག་པའམ།།གདོད་ནས་རང་བཞིན་མེད་པའི་ཕྱིར།།བདེན་པ་གཉིས་ཆར་མ་སྐྱེས་པས།།མེད་ཅེས་བརྗོད་ལ་ཅི་ཞིག་ཚོམ།།ཀ་བ་ཀ་ནས་དག་པ་ཡི།།ཤུལ་ན་མི་སྟོང་ཅུང་ཟད་མེད།།ཀ་བ་མེད་ཅེས་མ་བཀག་ན།།ཀ་བ་མིན་ཞེས་ཅི་ཞིག་ཡིན།།ཀ་བ་ཁེག་པའི་སྟོང་པ་དང་།།ཤུལ་ན་ལུས་པའི་སྣང་བ་ཞིག།སྟོང་དང་མི་སྟོང་ཟུང་འཇུག་ཏུ།།མི་རུང་སྲད་བུ་བསྒྲིལ་བ་བཞིན།།ཀ་བ་ཀ་བས་མི་སྟོང་དང་།།ཆོས་ཉིད་ཀ་བས་སྟོང་ངོ་ཞེས།།སྟོང་གཞི་བཞག་ནས་གཞན་སྟོང་པ།།ཚིག་དང་དོན་གྱི་གཞན་སྟོང་གཉིས།།ཨེ་མ་དེས་དེ་མ་སྟོང་ན།།སྟོང་གཞི་མི་སྟོང་ལྷག་མར་ལུས།།གཟུགས་ནི་གཟུགས་ཀྱིས་སྟོང་ངོ་ཞེས།།ལུང་དོན་རིགས་པར་བཅས་ལས་འགལ།།ཀ་བ་ཀ་བའི་བདེན་གྲུབ་གཉིས།།གཅིག་ན་གཅིག་ཁེག་གཅིག་ཀྱང་ཁེག།གཞན་ན་ཀ་བ་མ་ཡིན་པའི།།བདེན་གྲུབ་ཁེག་ཀྱང་ཀ་བ་ནི།།གང་གིས་མི་སྟོང་དཔྱད་བཟོད་འགྱུར།།བདེན་གྲུབ་ཡོད་མ་མྱོང་བའི་ཕྱིར།།གཅིག་དང་ཐ་དད་མི་དགོས་ན།།བདེན་གྲུབ་མེད་ཀྱང་སོ་སྐྱེའི་ངོར།།བུམ་པ་བདེན་པར་འཛིན་པའི་ཕྱིར།།མི་སྟོང་བུམ་པའི་ཕ་རོལ་ན།།བདེན་པར་གྲུབ་རྒྱུ་སུ་ཞིག་ཡིན།།དགག་བྱའི་སྣང་ཚུལ་ངེས་སོ་ལོ།།བདེན་གྲུབ་སོགས་ཀྱི་ཁྱད་པར་གང་།།དགག་བྱར་སྦྱར་ནས་སྟོན་པ་ནི།།རང་རྒྱུད་གཞུང་ལ་གྲགས་མོད་ཀྱང་།།དོན་དམ་དཔྱོད་པའི་དབང་དུ་ན།།དེ་སྦྱར་བ་ལ་དགོས་པ་ཅི།།སྟོང་ན་ཀུན་རྫོབ་ཙམ་དུ་ཡང་།།ཀ་བ་མེད་པ་ལྟར་སེམས་ནས།།ཚིག་འཁྲིའི་དོགས་པས་འདི་བྱས་ཀྱང་།།ཚིག་འཁྲིའི་འགལ་བ་འདི་ལ་ཆེ།།ཀུན་རྫོབ་ཙམ་དུ་ཀ་བ་ནི།།ཡོད་ཅེས་བྱས་པས་མི་ཆོག་པར།།དེས་དེ་མི་སྟོང་ཅི་ལ་ཟེར།།དེ་གཉིས་དོན་གཅིག་ཡིན་ཟེར་ན།།མ་ཡིན་ཀ་བ་ཡོད་ཅེས་དང་།།ཀ་བར་ཀ་བ་ཡོད་ཅེས་པ།།མི་མཚུངས་ཕྱི་མ་རྟེན་བརྟེན་པར།།དོན་གྱི་ཁས་བླངས་སོང་བ་བཞིན།།དོན་དམ་ཀ་བ་མི་དམིགས་ན།།ཀ་བ་ཀ་བས་མི་སྟོང་ཅི།།ཀུན་རྫོབ་ཀ་བ་ཀ་བས་ཞེས།།ལན་གཉིས་བརྗོད་པ་བརྡ་ལ་རྨོངས།།རང་ནི་རང་གིས་མི་སྟོང་ན།།རང་ཡོད་བཞིན་དུ་གཞན་གྱིས་སྟོང་།།དགག་བྱ་གཞན་དུ་མེད་གྱུར་ན།།རང་གིས་མི་སྟོང་ཁས་ལེན་འགལ།།སྤྱིར་ན་གཞན་གྱིས་སྟོང་པ་དེས།།སྟོང་གོ་ངེས་པར་མི་ཆོད་དེ།།རྟ་ལ་བ་ལང་མ་གྲུབ་ཀྱང་།།རྟ་དེ་སྟོང་པར་ག་ལ་ངེས།།རྟ་མཐོང་དེ་ཡིས་བ་ལང་ལ།།ཅི་ཞིག་ཕན་ཏེ་ཅི་ཞིག་གནོད།།དེ་ཕྱིར་མི་སྟོང་མྱང་འདས་དང་།།འཁོར་བའང་ཆོས་དང་ཆོས་ཉིད་དུ།།མི་རུང་སྣང་སྟོང་ཟུང་འཇུག་དང་།།སྲིད་ཞི་མཉམ་ཉིད་འདི་ལ་མེད།།ཆུ་ཟླ་ཟླ་བ་མིན་ནོ་ཞེས།།གནམ་ཟླས་སྟོང་དང་ཆུ་ཟླ་རང་།།སྣང་དེ་ཟུང་འཇུག་ཡིན་ན་ཀོ།ཟུང་འཇུག་རྟོགས་པ་སུས་ཀྱང་སླ།།བ་ལང་རྟ་མིན་ཀུན་གྱིས་ཤེས།།བ་ལང་སྣང་བར་མངོན་སུམ་མཐོང་།།དེ་རྟོགས་ངོ་མཚར་ཆེའོ་ཞེས།།བདག་ཉིད་ཆེན་པོས་ཇི་སྟེ་གསུངས།།དེས་ན་རང་གི་ལུགས་ལ་ནི།།ཆུ་ཟླ་བརྟགས་ན་ཆུ་ཟླ་ཉིད།།ཅུང་ཟད་མི་རྙེད་མེད་བཞིན་དུ།།ཆུ་ཟླ་སྣང་བར་མངོན་སུམ་ཚེ།།མེད་དགག་ཡིན་ཀྱང་སྣང་རུང་བ།།སྟོང་དང་ཡོད་པ་སོ་སྐྱེའི་བློར།།འགལ་ཡང་འདིར་ནི་མངོན་སུམ་དུ།།ཟུང་འཇུག་འདི་ལ་རྨད་བྱུང་ཞེས།།ངོ་མཚར་ཚིག་གིས་མཁས་རྣམས་བསྔགས།།སྟོང་པའི་ངོས་ནས་གཞལ་བ་ན།།མི་སྟོང་ཅུང་ཟད་ཡོད་མིན་ཕྱིར།།མེད་ཅེས་མཐའ་གཅིག་སྨྲར་བཏུབ་ཀྱང་།།མེད་དེའི་མེད་ཚུགས་མ་ཤོར་བཞིན།།སྣང་བ་འགོག་མེད་ཉིད་དུ་ཤར།།སྣང་དེའི་སྣང་ཚུགས་མ་ཤོར་བཞིན།།གཞི་མེད་སྟོང་པ་ཆེན་པོར་གནས།།དེ་ལ་འདི་སྟོང་འདིས་སྟོང་དང་།།འདི་སྣང་འདི་སྟོང་དབྱེ་བ་ཞིག།ནམ་ཡང་རྙེད་པ་མེད་པ་ལ།།ཁོ་ཐག་ནང་ནས་ཆོད་པའི་ཚེ།།དོན་ཚོལ་མཁན་པོ་དོན་མེད་པས།།ཡིད་ཆད་སྐྱེ་བ་མེད་ཀྱི་རྟིང་།།ཡིད་བདེ་ཐོབ་པ་ངོ་མཚར་ཆེ།༈།འགའ་ཞིག་ཉན་རང་དགྲ་བཅོམ་པས།།ཆོས་ཀྱི་བདག་མེད་མ་རྟོགས་ཟེར།།ཕུང་པོར་ང་ཙམ་འཛིན་པའི་བདག།མ་ཁེག་དེ་སྲིད་དེའི་ནུས་པས།།ཉོན་མོངས་སྤོང་བ་མེད་པ་དང་།།བདག་དེའང་ཕུང་པོ་ལ་བརྟེན་ནས།།བཏགས་ཙམ་ངར་འཛིན་ལྷན་སྐྱེས་ཀྱི།།ཡུལ་ཡིན་དེ་དང་བུམ་སོགས་ལ།།སྟོང་གཞིའི་དབྱེ་བ་མ་གཏོགས་པ།།སྟོང་ཚུལ་ཁྱད་པར་འགའ་མེད་དེ།།ཆོས་དང་གང་ཟག་སོ་སོར་ཡང་།།རང་བཞིན་གྲུབ་པས་སྟོང་ཕྱིར་རོ།།དེ་ལྟར་ལུང་དང་རིགས་པས་ཀྱང་།།མངོན་སུམ་གྲུབ་ལས་བརྒལ་ནས་སུ།།ཉན་རང་སྟོང་ཉིད་མ་རྟོགས་ཞེས།།སྨྲ་བ་དམ་བཅའ་ཙམ་དུ་ཟད།།དེ་ལ་ཁ་ཅིག་ཐལ་ཆེས་པས།།ཐེག་གསུམ་མཐོང་ལམ་གཅིག་པ་དང་།།རྟོགས་པ་མཐོ་དམན་མེད་པར་འདོད།།ཤེར་ཕྱིན་སྔགས་སོགས་མདོ་རྒྱུད་གཞུང་།།ཀུན་ཀྱང་དྲང་བའི་དོན་དུ་འགྲེལ།།དེ་ལ་དམན་ལམ་སྔོན་སོང་བའི།།ཐེག་ཆེན་མཐོང་ལམ་ཐོབ་སོགས་ཚེ།།སྤང་བྱ་ཅུང་ཟད་མེད་སོགས་སྐྱོན།།རིགས་པས་གནོད་པ་བཟློག་མེད་འབབ།།གཞན་ཡང་རྟོགས་བྱ་རྟོགས་གྱུར་ཀྱང་།།སྤང་བྱ་སྤོང་བར་གྲོགས་དགོས་ཟེར།།མ་རྟོགས་རྟོགས་པར་ཁས་བླང་འགལ།།རྟོགས་ན་སྤང་བྱ་མི་སྤོང་འགལ།།ཉི་མ་ཤར་ཡང་མུན་པའི་དཔུང་།།འཇོམས་པ་གཞན་ལ་ལྟོས་པ་མཚར།།ཁ་ཅིག་ཉན་རང་རང་རྒྱུད་ཀྱི།།ཕུང་པོ་ལྔ་པོ་སྟོང་རྟོགས་ཀྱང་།།ཆོས་གཞན་བདག་མེད་མི་རྟོགས་ཟེར།།ཕུང་པོ་ལྔ་པོ་སྟོང་རྟོགས་ན།།འདུས་མ་བྱས་ཙམ་མ་གཏོགས་པའི།།མ་རྟོགས་དངོས་གཞན་ཅི་ཞིག་ཡོད།།དེས་ན་རང་ལུགས་གང་ཡིན་ན།།དཔལ་ལྡན་ཟླ་བའི་རང་འགྲེལ་ལས།།ཉོན་མོངས་སྤངས་ཕྱིར་ཉན་རང་ལ།།རྒྱལ་བས་གང་ཟག་བདག་མེད་དང་།།ཤེས་སྒྲིབ་སྤངས་ཕྱིར་རྒྱལ་སྲས་ལ།།ཆོས་བདག་མེད་པ་རྫོགས་པར་བསྟན།།འོ་ན་ཉན་རང་གཉིས་པོ་ལ།།སྟོང་ཉིད་རྟོགས་པ་ཡོད་དོ་ཞེས།།སྨྲས་པ་ཇི་ལྟར་ཡིན་ཞེ་ན།།ཉན་རང་དེ་དག་ཀུན་ཉོན་ཙམ།།སྤངས་ཕྱིར་གང་ཟག་མེད་སྒོམ་གྱི།།ཆོས་ཀྱི་བདག་མེད་རྫོགས་པར་ནི།།སྒོམ་པ་མེད་ཅེས་གསུངས་པ་བཞིན།།ཀློང་ཆེན་རབ་འབྱམས་ཞལ་སྔ་ནས།།སྔོན་གྱི་སློབ་དཔོན་ཐམས་ཅད་ནི།།ཡོད་དང་མེད་ཅེས་རྩོད་ན་ཡང་།།རང་བཞེད་སྔོན་གྱི་ཉན་རང་ལ།།ཅི་རིགས་སྣང་ཡང་དགྲ་བཅོམ་པ།།འཐོབ་ལ་ཕུང་པོར་འཛིན་པའི་བདག།སྟོང་པར་མ་རྟོགས་ཐར་མིན་པས།།དེ་ཙམ་རྟོགས་པ་ཡོད་ན་ཡང་།།བདག་མེད་རྫོགས་པར་རྟོགས་པ་མེད།།ཡུངས་འབྲུ་སྲིན་གྱིས་ཟོས་པ་ཡི།།ནང་གི་མཁའ་བཞིན་ཉན་རང་གི།བདག་མེད་ཆུང་ངུར་གསུངས་པ་སྟེ།།དེ་ཕྱིར་དམན་ལ་དགག་པའི་སྒྲས།།སྟོང་ཉིད་མ་རྟོགས་ཞེས་བཞེད་གསུངས།།འདི་ནི་ཕུལ་བྱུང་ལེགས་བཤད་དེ།།འདི་དང་མཚུངས་པ་གཞན་མ་མཆིས།།དཔེར་ན་རྒྱ་མཚོ་ཆེན་པོའི་ཆུ།།ཧུབ་གང་བཏུང་ཡང་རྒྱ་མཚོ་ནི།།མ་བཏུང་ཞེས་སུ་མི་རུང་ལྟར།།ཆོས་ཀྱི་བྱེ་བྲག་ང་ཙམ་པོ།།བདག་མེད་མཐོང་ཕྱིར་སྟོང་མཐོང་འདོད།།ཧུབ་གཅིག་བཏུང་བས་རྒྱ་མཚོའི་ཆུ།།རྫོགས་པར་ཁོང་དུ་མ་སོང་ལྟར།།མཐའ་དག་ཤེས་བྱའི་རང་བཞིན་ཀུན།།སྟོང་པར་རྟོགས་པ་མེད་པའི་ཕྱིར།།བདག་མེད་རྫོགས་པར་མ་མཐོང་འདོད།།གལ་ཏེ་ཆོས་གཅིག་སྟོང་མཐོང་ན།།ཐམས་ཅད་མི་མཐོང་ཅི་ཞེ་ན།།དེ་གས་ལུང་རིགས་མན་ངག་གིས།།བརྟགས་ན་དེ་ལྟར་མཐོང་མོད་ཀྱི།།རེ་ཞིག་ཉན་ཐོས་རིགས་ཅན་རྣམས།།གང་ཟག་མེད་ཙམ་ཁོ་ན་ལ།།ཞེན་པས་མཐའ་གཞན་རྟོགས་དཀའ་སྟེ།།བུམ་པར་བརྟགས་པར་འདོད་རྣམས་ཀྱང་།།རྡུལ་ཕྲན་རྫས་སུ་འདོད་པ་བཞིན།།གལ་ཏེ་བུམ་པ་བཏགས་པར་ནི།།རྟོགས་པའི་བློ་དེས་རྡུལ་ལ་ཡང་།།དཔྱད་ན་རྟོགས་པར་རིགས་མོད་ཀྱི།།རེ་ཞིག་མ་རྟོགས་དེ་བཞིན་ནོ།།རགས་པའི་གཞི་དང་ཆ་མེད་རྡུལ།།འགལ་བར་སྣང་ཡང་དེ་དག་ལ།།རེ་ཞིག་ལུང་དང་མན་ངག་གིས།།དབེན་ཕྱིར་མི་འགལ་གྲུབ་མཐར་བསྒྲུབས།།དེ་བཞིན་སེམས་ཙམ་དག་གིས་ཀྱང་།།གཟུང་བ་མེད་ན་འཛིན་པ་ཡང་།།ཅི་ཕྱིར་མི་རྟོགས་རང་རྒྱུད་པས།།དོན་དམ་བདེན་མེད་རིགས་པ་དེས།།ཐ་སྙད་དུ་ཡང་རང་མཚན་གྱིས།།གྲུབ་པ་མེད་པས་ཅིས་མི་རྟོགས།།དེས་ན་ཐམས་ཅད་ཐལ་འགྱུར་བ།།འབའ་ཞིག་ཉིད་དུ་ཁྱོད་ལ་ཐལ།།ཉན་རང་ཐེག་པ་ཆེན་པོ་ལ།།བསྐུར་ཞིང་སྨོད་པའང་ག་ལ་སྲིད།།དེས་ན་གཅིག་གི་རང་བཞིན་ཉིད།།ཀུན་ལ་མཉམ་ཉིད་ཡིན་ན་ཡང་།།ཕྱི་དང་ནང་གི་རྐྱེན་གྱི་ཚོགས།།མ་ཚང་དེ་སྲིད་རྟོགས་པ་བུལ།།སྤྱིར་ན་དབང་རྣོན་རང་སྟོབས་ཀྱིས།།རྟོགས་པ་ཡོད་ཀྱིས་རྟུལ་པོ་ཡིས།།རང་གིས་དེ་མ་ཐག་ཏུ་ཡང་།།ངེས་པར་རྟོགས་པའི་ཁྱབ་པ་མེད།།ནམ་ཞིག་ཅིས་ཀྱང་རྟོགས་ངེས་ཏེ།།བསྐལ་པ་སྟོང་ཕྲག་བཅུ་ཡི་མཐར།།འགོག་པའི་དབྱིངས་ལས་དགྲ་བཅོམ་པ།།ལྡང་སྟེ་ཐེག་ཆེན་འཇུག་པར་གསུངས།།ཚུལ་བཞིན་ཐེག་ཆེན་ཞུགས་པས་ཀྱང་།།གྲངས་མེད་བསྐལ་པར་གོམས་དགོས་ན།།ཉན་ཐོས་ཞི་བདེ་དོན་གཉེར་བས།།བསྐལ་པ་སྟོང་ཕྲག་དེ་ཙམ་ལ།།བདག་མེད་མཐའ་དག་མ་རྟོགས་པའི།།གནས་སྐབས་མི་སྲིད་ཅི་ལ་འགྱུར།།ས་ཐོབ་རྣམས་ལའང་ཆོས་ཀྱི་དབྱིངས།།ཇེ་བས་ཇེ་གསལ་རྫོགས་མིན་ནམ།།ཚོགས་བསགས་གྲོགས་དང་རིག་པའི་སྒོ།།མཐའ་ཡས་ཚུལ་དང་བྱང་སེམས་ཀྱི།།སྤྱོད་པ་ཡོངས་བསྔོའི་རྐྱེན་ཚང་ན།།ངེས་པར་རྫོགས་པར་རྟོགས་འགྱུར་ཏེ།།ཐབས་ལ་མཁས་པའི་རྐྱེན་ཚང་བས།།སྔགས་ཀྱིས་མྱུར་དུ་རྟོགས་པ་བཞིན།།རྟག་བདག་སྤངས་ཀྱང་ལྷན་སྐྱེས་ཀྱི།།ངར་འཛིན་ཕུང་པོར་བརྟེན་ནས་འཇུག།དེ་ཕྱིར་ཕུང་པོར་འཛིན་ཡོད་པ།།དེ་སྲིད་ངར་འཛིན་ཡོད་གསུང་དོན།།གདགས་གཞི་ཕུང་པོ་ཡོད་གྱུར་ཅིང་།།དེར་འཛིན་སེམས་པ་ཡོད་ཇི་སྲིད།།བདག་ཏུ་གདགས་པའི་རྒྱུ་ཚང་བས།།འབྲས་བུ་བདག་འཛིན་མི་ལྡོག་གསུངས།།གང་ཕྱིར་རྟག་བདག་སྤངས་ཀྱང་ནི།།གདགས་གཞིར་བརྟེན་ནས་བཏགས་པའི་བདག།ལྷན་སྐྱེས་ཞེན་ཡུལ་མ་བཀག་ཕྱིར།།ངར་འཛིན་སྐྱེ་ལ་གེགས་མེད་ཉིད།།དེ་ཕྱིར་ཉོན་མོངས་སྤོང་བ་ལ།།ཕུང་སོགས་སྟོང་པར་རྟོགས་དགོས་ཞེས།།འཆད་པ་ལུང་འདིའི་དོན་མིན་ཏེ།།དེ་དོན་འདི་བཞིན་ཟླ་བས་བཀྲལ།།བཏགས་པའི་ང་ཙམ་ཤེས་གྱུར་ན།།ངར་འཛིན་ལྡོག་ལ་དེས་ཆོག་སྟེ།།ཐག་པ་མེད་པར་མ་ཤེས་ཀྱང་།།སྦྲུལ་འཛིན་སྦྲུལ་མེད་མཐོང་བས་ལྡོག༈།མཐར་ནི་ངེས་པར་རྟོགས་དགོས་ཏེ།།ཆོས་ཀུན་དེ་ཉིད་གཅིག་ཡིན་ཅིང་།།དེ་ཉིད་མཐོང་བའི་ཚུལ་གཅིག་པས།།མཐར་ཐུག་ཐེག་གཅིག་འགྲུབ་པ་ཡི།།རིགས་པ་ཀླུ་སྒྲུབ་ཡབ་སྲས་སྨྲ།།གལ་ཏེ་ཁྱོད་ཀྱི་ལུགས་ལྟར་ན།།དེ་ཉིད་ཉན་རང་མཐོང་ཟིན་པས།།རིགས་པ་དེ་ཡིས་ཐེག་གཅིག་ཏུ།།ཅི་ཞིག་འགྲུབ་སྟེ་དམ་བཅའ་ཙམ།།འདིར་ནི་ཟུང་འཇུག་ཡེ་ཤེས་གང་།།མཐར་ཐུག་གཟིགས་པ་དེ་ཁོ་ན།།དེ་བཞིན་ཉིད་གཅིག་དེ་ཡིན་ཏེ།།འཕགས་ཀུན་དེ་ལ་གཞོལ་ཞིང་འབབ།།དེས་ན་ཚུལ་འདི་ལེགས་རྟོགས་ན།།ཀླུ་སྒྲུབ་ལུགས་དང་བྱམས་པའི་གཞུང་།།ཕན་ཚུན་བུ་རམ་སྦྲང་རྩི་བཞིན།།ལྷན་ཅིག་ཡི་དགས་བདེར་འཇུ་ཡི།།གཞན་དུ་མི་འཕྲོད་ཟས་བཞིན་དུ།།ཁོང་ན་མི་བདེའི་སྐྲན་གྱུར་ཚེ།།ལུང་རིགས་གཙགས་བུ་རྣོན་པོ་བརྒྱ།།གདེངས་ཤིང་འདེབས་ལ་ཡིད་གཏིང་སྡར།༈།ལྟ་བའི་དངོས་གཞི་སྐྱོང་བའི་དུས།།ཁ་ཅིག་ཅིར་ཡང་མི་འཛིན་ཟེར།།ཅིར་ཡང་མི་འཛིན་ཞེས་པའི་དོན།།ལེགས་པར་རྟོགས་དང་ལོག་རྟོག་གཉིས།།དང་པོ་མཐའ་བཞིའི་སྤྲོས་བྲལ་ཏེ།།འཕགས་པའི་ཡེ་ཤེས་ཀྱི་མདུན་ན།།གང་ཡང་གནས་པ་མེད་མཐོང་བས།།འཛིན་སྟངས་ངང་གིས་ཞིག་པ་སྟེ།།སྟོང་གསལ་མཁའ་ལ་ལྟ་དང་མཚུངས།།གཉིས་པ་དྲན་མེད་ཧ་ཤང་ལུགས།།མ་དཔྱད་ཙན་ནེར་བཞག་པ་ཡིས།།ལྷག་མཐོང་གསལ་བའི་ཆ་མེད་པར།།མཚོ་གཏིང་རྡོ་བཞིན་ཐ་མལ་གནས།།དཔེར་ན་ཅི་ཡང་མེད་ཅེས་པ།།དབུ་མས་མེད་པར་མཐོང་བ་དང་།།གཟུགས་མེད་མེད་པར་མོས་པ་ལྟར།།ཚིག་ཙམ་མཚུངས་པ་འདི་དག་ཀྱང་།།དོན་ལ་མི་མཚུངས་གནམ་ས་བཞིན།།དེ་ལྟར་མཐའ་བཞིའི་སྤྲོས་བྲལ་ལ།།མཐའ་བཞི་གང་དུའང་མི་འཛིན་ན།།མཐའ་བཞི་ལས་འདས་འཛིན་སྟངས་ཞིག།མེད་པས་འཛིན་སྟངས་མེད་པར་འདོད།།གལ་ཏེ་འཛིན་སྟངས་མེད་ཅེས་པས།།བླུན་པོ་ཁ་ཅིག་དང་པོ་ནས།།ཅིར་མི་འཛིན་པ་ལྷོད་དོ་ལོ།།འགྲོ་ཀུན་ཐ་མལ་ཀློད་ཆེས་པས།།ཁམས་གསུམ་འཁོར་བར་གཏན་འཁྱམས་ན།།ད་དུང་བཀླགས་ཏེ་བསྐུལ་མི་དགོས།།གལ་ཏེ་དེ་དག་མི་ཤེས་བཞིན།།བདག་ཅག་རང་ངོ་ཤེས་ཟེར་ན།།དོན་དམ་རང་ངོ་ཤེས་པ་ལ།།བདེན་སྟོང་ཕུ་ཐག་ཆོད་པ་དགོས།།འཁྲུལ་སྣང་བདག་དང་གཞན་ནོ་ཞེས།།སུས་ཀྱང་ཤེས་ལ་སྒོམ་ཅི་དགོས།།གལ་ཏེ་སེམས་ལ་མདོག་དབྱིབས་དང་།།བྱུང་གནས་འགྲོ་ས་བརྟག་པའི་ཚེ།།མ་མཐོང་སྟོང་པར་རྟོགས་ཤེ་ན།།ཆོས་ཚུལ་ཤིན་ཏུ་ཟབ་པ་སྟེ།།འདི་ལའང་གོལ་ས་ཤིན་ཏུ་ཆེ།།སེམས་ནི་གཟུགས་ཅན་མ་ཡིན་པས།།སུས་ཀྱང་མདོག་སོགས་མཐོང་མི་སྲིད།།མ་མཐོང་ཙམ་ལ་སྟོང་པ་ཉིད།།ངོ་འཕྲོད་སྙམ་ན་ཤིན་ཏུ་གོལ།།ལན་བརྒྱར་བརྟགས་ཀྱང་མི་ཡི་མགོར།།ཕྱུགས་ཀྱི་རྭ་ཅོ་མཐོང་མི་སྲིད།།དེ་མ་མཐོང་བས་དེ་སྟོང་པར།།རྟོགས་སོ་ཞེ་ན་སུས་ཀྱང་སླ།།དེས་ན་རིགས་པའི་དཔྱད་པ་དེས།།གནས་ལུགས་ཐིག་པོ་ཞིག་མཐོང་ན།།སེམས་དེ་སྒྱུ་མ་ལྟ་བུ་ལ།།ངོ་བོ་བདེན་མེད་གཏིང་ནས་རིག།དེ་ཚེ་ཐད་ཀའི་ནམ་མཁའ་ལ།།བལྟས་པ་བཞིན་དུ་རང་གི་སེམས།།འགྱུ་བཞིན་པ་ཡང་སྟོང་པ་ཡི།།ངེས་ཤེས་ཁོ་ཐག་ཆོད་པ་དགོས།།ཡང་ནི་ཁྱོད་ཀྱི་སེམས་དེ་ནི།།མེད་པ་མཁའ་འདྲ་ཞིག་འདུག་གམ།།སྣ་ཚོགས་ཤེས་པ་གང་ཡིན་ཟེར།།སྐད་ཅིག་མི་སྡོད་གཡོ་བའི་སེམས།།སུ་ལའང་ཡོད་ཕྱིར་ཤེས་པ་ཞིག།འདུག་པར་སུས་ཀྱང་ངེས་པར་སྨྲ།།དེ་བས་ཡོད་པ་མ་ཡིན་ལ།།མེད་པའང་མེད་པའི་སེམས་དེ་ནི།།འོད་གསལ་ཆོས་སྐུ་ཡིན་ནོ་ཟེར།།དེས་ཀྱང་ངོ་འཕྲོད་རློམ་པ་བཅས།།ཐོས་པ་མང་པོ་མ་བྱས་ཀྱང་།།གཅིག་ཤེས་ཀུན་གྲོལ་ཤེས་སོ་ལོ།།རྫོགས་ཆེན་ཡོད་མིན་མེད་མིན་ནི།།མཐའ་བཞིའི་སྤྲོས་དང་བྲལ་བ་ཡིན།།ཁྱོད་ཀྱི་འདི་ནི་ལེགས་བརྟགས་ན།།ཡོད་པར་སྨྲ་རུ་མི་གཏུབ་ཅིང་།།མེད་པར་ཡང་ནི་སྨྲར་མེད་པ།།དོན་དུ་ཡོད་མེད་གཉིས་ཡིན་ནམ།།ཡང་ན་གཉིས་ཀ་མིན་པའི་མུ།།གང་རུང་ཞིག་ལས་མ་འདས་པར།།སེམས་དེ་ཡོད་མིན་མེད་མིན་གྱི།།གཞི་རུ་ཞེ་ལ་བརྣག་ཀྱིན་གདའ།།དེ་ནི་བསམ་མི་ཁྱབ་པའི་བདག།དེ་དང་མིང་གི་རྣམ་གྲངས་ལས།།དོན་ལ་འདོད་ཚུལ་ཁྱད་པར་མེད།།སེམས་དང་དེ་ལས་གཞན་གྱི་ཆོས།།ཀུན་ཀྱང་བདེན་མེད་ངེས་པའི་སྟེང་།།སྣང་བ་རྟེན་འབྱུང་དུ་ཤར་བས།།ཡིན་མིན་བསམ་བརྗོད་ལས་འདས་པ།།མཐའ་བཞིའི་སྤྲོས་དང་བྲལ་བའི་གནད།།གཏད་མེད་ཟང་མ་ཐལ་བྱུང་ངོ་།།འདི་ནི་ཡིན་མིན་གཉིས་བྲལ་ཞེས།།བློ་ཡི་མདུན་ན་འབེན་བཞིན་གནས།།བདག་གཞན་དངོས་འཛིན་འདིར་བརྟེན་ནས།།སྲིད་པའི་ཆུ་བོ་བརྒྱུད་མར་འཇུག།འདི་དག་བཟློག་པའི་གཉེན་པོ་ནི།།བདག་མེད་པ་ཡི་འཛིན་སྟངས་ཡིན།།དེ་ཡང་མེད་ཚུལ་མ་ཤེས་པར།།མེད་པར་མོས་པས་མི་ཕན་ཏེ།།ཐག་ཁྲ་སྦྲུལ་དུ་འཁྲུལ་པ་ལ།།སྦྲུལ་མེད་སྙམ་པས་མི་ཕན་ཀྱང་།།མེད་ཚུལ་མཐོང་ན་སྤངས་པ་བཞིན།།དེ་ཕྱིར་དཔྱད་པས་རྟོགས་བྱས་ནས།།དཔྱད་ཙམ་ཉིད་དུ་མི་བཞག་པར།།ཐོག་མེད་དངོས་ཞེན་གོམས་ཆེས་པས།།ཡང་ཡང་འཛིན་སྟངས་བཅས་ཏེ་བསྒོམ།།བདག་མེད་གོམས་པས་བདག་ལྟ་བ།།དྲུང་ནས་འབྱིན་ཕྱིར་འདི་དགོས་ཞེས།།དོན་གཟིགས་དུ་མས་ནན་ཏན་བསྒྲུབས།།དང་པོའི་ལས་ཅན་འཇུག་པའི་སྒོ།།གོལ་འཆུག་མེད་པ་འདི་ཡིན་ནོ།།དང་པོ་ནས་དེ་སྤོང་ཞེས་པ།།བདུད་ཀྱི་གསང་ཚིག་བཀྱེ་བ་ཡིན།།འཛིན་སྟངས་དེས་དྲངས་བདེན་སྟོང་ལ།།ངེས་ཤེས་མཆོག་ཏུ་འདྲོངས་པའི་ཚེ།།ད་གདོད་མེད་འཛིན་ཙམ་པོ་ནི།།གནས་ལུགས་མཐར་ཐུག་མ་ཡིན་པས།།སྒྲོ་འདོགས་སོ་གཉིས་བྲལ་བ་ཡི།།སྤྲོས་བྲལ་སྟོང་པ་ཆེན་པོ་བསྒོམ།།བདེན་སྟོང་ཕུ་ཐག་ཆོད་གྱུར་ནས།།སྟོང་པ་རྟེན་འབྱུང་ཤར་བ་ཡི།།སྣང་སྟོང་ཅིར་ཡང་མི་འཛིན་ལ།།མེ་ཡི་ཁ་ནས་དག་པའི་གསེར།།ཇི་བཞིན་ཡིད་ཆེས་རུང་མོད་ཀྱི།།གཞན་དུ་ཆེས་ཆེར་ཟབ་པའི་གནད།།འཕགས་བོད་མཁས་གྲུབ་ཆེ་རྣམས་ཀྱིས།།ཡུན་རིང་འབད་དེ་རྟོགས་པའི་དོན།།ཀྱེ་མ་བླུན་པོས་ཡུད་ཙམ་ལ།།རྟོགས་པར་སྨྲ་ལ་ཐེ་ཚོམ་གཡོ།།དངོས་གཞི་སྣང་སྲིད་འཁོར་འདས་ཀུན།།ཡོད་མེད་ལས་འདས་དོན་གྱི་གཤིས།།ཡོད་མེད་ཅིར་ཡང་མ་གྲུབ་ན།།ཕྱོགས་རེར་འཛིན་པ་སྤྲོས་དང་བཅས།།དེ་ཕྱིར་རིགས་པས་རྣམ་དཔྱད་ཚེ།།ཅིར་ཡང་གྲུབ་པ་མ་མཐོང་བས།།ཅིར་ཡང་འཛིན་པ་ག་ལ་སྐྱེ།།འོན་ཀྱང་མཐའ་བཞིའི་སྤྲོས་བྲལ་ཚུལ།།དཔྱད་པས་དྲང་བའི་ངེས་ཤེས་ལས།།རང་བྱུང་འོད་གསལ་ཤེས་རབ་ཀྱི།།ལྷག་མཐོང་མར་མེ་བཞིན་དུ་གསལ།།དེ་དང་རྣམ་པ་འགལ་བ་ཡི།།མཐའ་བཞིའི་བློ་ངན་མུན་པའི་སྨག།དྲུངས་འབྱིན་གཉེན་པོ་འདི་ཡིན་པས།།ནམ་སྒོམ་ངེས་ཤེས་སྐྱེ་བ་དགོས།།མཐའ་བཞིའི་སྤྲོས་པ་གཅིག་ཆར་དུ།།ཁེག་པ་བློ་འདས་གཉུག་མའི་དབྱིངས།།སོ་སོའི་སྐྱེ་བོའི་ས་ཉིད་ན།།ཅར་ཕོག་ཚུལ་གྱིས་མཐོང་དཀའ་བས།།མཐའ་བཞིའི་སྤྲོས་པ་རེས་འཇོག་ཏུ།།འགོག་པ་ཐོས་བསམ་ལྟ་བའི་ལུགས།།དེ་ལ་ཅི་ཙམ་གོམས་པ་བཞིན།།ངེས་ཤེས་ཇེ་བས་ཇེ་གསལ་ནས།།ཕྱིན་ལོག་སྒྲོ་འདོགས་བསྣུབ་བྱས་པའི།།བློ་གྲོས་ཡར་ཟླ་ལྟ་བུར་འཕེལ།།ཅིར་ཡང་མི་འཛིན་ལྟ་ངན་ལ།།དངོས་པོ་ཅིར་ཡང་མ་གྲུབ་པའི།།ངེས་ཤེས་སྐྱེ་བ་ག་ལ་ཡོད།།དེས་ན་སྒྲིབ་པ་སྤོང་མི་ནུས།།དེ་ཕྱིར་འདི་གཉིས་ཁྱད་པར་ཡང་།།དུ་བའི་རྟགས་ལས་མེ་བཞིན་དུ།།སྤངས་རྟོགས་བོག་བསྐྱེད་ཚུལ་ལས་ཤེས།།གང་ཕྱིར་བླུན་བསྒོམ་ཐ་མལ་པ།།སྤངས་དང་རྟོགས་པའི་རྒྱུ་མིན་ལ།།ཡོན་ཏན་སྐྱེ་བའི་གེགས་ཡིན་ཕྱིར།།རྒྱ་ཇ་ཚགས་ལ་དྲངས་པ་བཞིན།།ལུང་རྟོགས་འགྲིབ་ཅིང་ཉོན་མོངས་འཕེལ།།ཁྱད་པར་རྒྱུ་འབྲས་ཡིད་ཆེས་ཆུང་།།ཡང་དག་ལྟ་བའི་མིག་ལྡན་ན།།སྔར་མེད་ལུང་དང་ཉམས་རྟོགས་འབར།།སྟོང་མཐོང་དེ་ཡི་ཡོན་ཏན་ལས།།རྒྱུ་འབྲས་རྟེན་འབྲེལ་བསླུ་མེད་ལ།།ཡིད་ཆེས་ཉོན་མོངས་ཆུང་བར་འགྱུར།།དཔྱད་པས་ངེས་ཤེས་དྲངས་པའི་ངང་།།རྩེ་གཅིག་བཞག་པའི་ཏིང་འཛིན་ལ།།མ་མཐོང་མཐོང་བ་དམ་པའི་དོན།།མཐོང་དོན་ཕྱོགས་སུ་མ་ལྷུང་བས།།ཅིར་ཡང་བཟུང་བ་མེད་མོད་ཀྱི།།ལྐུགས་པས་བུ་རམ་མྱོང་བ་ལྟར།།ཡིད་ཆེས་གོམས་པའི་རྣལ་འབྱོར་ལ།།སྐྱེ་ཡི་དཔྱད་པ་ཁོ་ནས་མིན།༈།ཐེག་མཆོག་ལྟ་བ་བསྒོམ་པ་ལ།།དཔྱད་དང་འཇོག་པ་གང་འཐད་ན།།ལ་ལས་མི་དཔྱད་བཞག་སྟེ་སྒོམ།།དཔྱད་པས་དོན་ལ་སྒྲིབ་པས་ན།།མ་དཔྱད་སྦོམ་པོར་ཞོག་དང་ཟེར།།ལ་ལས་དཔྱད་པ་ཁོ་ན་བྱེད།།དཔྱད་པ་དང་བྲལ་བསྒོམ་པ་ནི།།གཉིད་དུ་སོང་ལྟར་མི་ཕན་པས།།ནམ་ཡང་དཔྱད་པ་དགོས་སོ་ཟེར།།སྒོམ་པ་དཔྱད་འཇོག་མཐའ་གཅིག་ཏུ།།ཕྱོགས་རེར་འཛིན་པར་མི་རུང་སྟེ།།མ་དཔྱད་པ་ཡི་འཇོག་སྒོམས་ལ།།ཞི་གནས་ཙམ་ཞིག་འགྲུབ་སྲིད་ཀྱང་།།བསྒོམས་པས་ངེས་ཤེས་མི་སྐྱེ་བས།།ཐར་ལམ་མིག་གཅིག་ངེས་ཤེས་ཉིད།།སྤངས་ནས་སྒྲིབ་པ་བསལ་མི་ནུས།།ཆོས་ཀྱི་རང་བཞིན་མ་ཤེས་ན།།ཅི་ཞིག་བསྒོམ་སྟེ་ཐ་མལ་གྱི།།རྣམ་རྟོག་སྒོམ་པས་ཅི་ལ་ཕན།།མིག་མེད་ལམ་དུ་ཞུགས་པ་བཞིན།།ཐོག་མེད་འཁྲུལ་པའི་བག་ཆགས་ཀྱིས།།རང་བཞིན་ལོག་པར་ཞེན་གྱུར་པ།།ཐབས་ཚུལ་རིགས་པ་བརྒྱ་དག་གིས།།འབད་དེ་མ་བརྟག་རྟོགས་པར་དཀའ།།གང་ཕྱིར་འཁྲུལ་སྣང་ཞེན་པ་དང་།།ཡང་དག་དོན་མཐོང་འགལ་བས་ན།།ཆེས་གོམས་སྲིད་པའི་སྨག་རུམ་འདིར།།དེ་ཉིད་སྣང་བ་རྙེད་པར་དཀའ།།སྔོན་ནས་སྦྱངས་པའི་ལས་ཀྱི་འཕྲོ།།སྨན་དང་བླ་མའི་བྱིན་རླབས་ལས།།བྱུང་གནས་འགྲོ་འོང་ཙམ་བརྟགས་པས།།བདེན་སྟོང་ངེས་པ་སྲིད་མོད་ཀྱི།།དེ་འདྲ་བརྒྱ་ལམ་རེས་འགའ་སྟེ།།ཀུན་གྱིས་དེ་ལྟར་རྟོགས་མི་ནུས།།ཀ་དག་གདར་ཤ་ཆོད་པ་ལ།།ཐལ་འགྱུར་ལྟ་བ་མཐར་ཕྱིན་དགོས།།སྤྲོས་བྲལ་ཙམ་གྱི་ཆ་ནས་ནི།།དེ་གཉིས་ཁྱད་པར་མེད་དོ་གསུངས།།སྟོང་པར་ཞེན་པ་བཟློག་ཕྱིར་དུ།།སྔགས་ལས་བདེ་བ་ཆེན་པོ་བསྟན།།བདེ་སྟོང་གཉིས་སུ་མེད་པའི་དབྱིངས།།ཡུལ་དང་ཡུལ་ཅན་བྲལ་བ་ཡི།།ཚུལ་གྱིས་ཉམས་སུ་མྱོང་བར་བྱེད།།སྣང་དང་གསལ་དང་རིག་པ་གསུམ།།བདེ་བ་དེ་ཡི་རྣམ་གྲངས་ཡིན།།སྣང་ཆ་གཟུགས་ཀྱི་སྐུ་འདིས་ནི།།སྲིད་པ་ཇི་སྲིད་ཕན་བདེ་ཡིས།།འགྲོ་ཀུན་སྐྱོབས་པར་མཛད་པས་ན།།མཐར་ཐུག་སྙིང་རྗེའི་རང་བཞིན་ཉིད།།དེ་ཕྱིར་རང་བཞིན་ཉིད་ཀྱིས་ཀྱང་།།སྲིད་ཞིར་མི་གནས་ཡེ་ཤེས་ཆེ།།གཞི་ལ་ཇི་ལྟར་བཞུགས་པ་ལྟར།།བདེ་སྟོང་ལམ་གྱི་ཨེ་ཝཾ་གྱིས།།བསྒྲུབས་པས་ཚེ་འདི་ཉིད་ལ་ཡང་།།ཟུང་འཇུག་འབྲས་བུ་མངོན་དུ་འགྱུར།།གཞི་ལམ་འབྲས་གསུམ་དོན་དུ་ན།།མི་ཕྱེད་རྡོ་རྗེའི་ཐེག་པ་ཡི།།འབྲས་བུ་བཞི་པའི་དབང་གི་ལམ།།རིག་སྟོང་རང་བྱུང་ཡེ་ཤེས་ཉིད།།ཁོ་ན་རྩལ་དུ་བཏོན་གྱུར་པ།།འོད་གསལ་རྡོ་རྗེ་རྩེ་མོའི་ལུགས།།མཐར་ཐུག་ཐེག་པའི་སྐྱེལ་སོ་ཡིན།།ཇི་སྲིད་ངེས་ཤེས་མ་སྐྱེས་བར།།ཐབས་དང་དཔྱད་པས་ངེས་ཤེས་དྲངས།།ངེས་ཤེས་སྐྱེས་ན་དེ་ཡི་ངང་།།ངེས་ཤེས་ཉིད་དང་མ་བྲལ་བསྒོམས།།ངེས་ཤེས་མར་མེ་ལྟ་བུའི་རྒྱུན།།ཡང་དག་མིན་རྟོག་སྣུབ་བྱེད་པ།།དེ་ལ་རྟག་ཏུ་ནན་ཏན་བྱ།།བྲལ་ན་སླར་ཡང་དཔྱད་པས་དྲངས།།དང་པོ་དཔྱད་པ་གལ་ཆེ་སྟེ།།དཔྱད་པ་བཟང་པོས་མ་དྲངས་ན།།ངེས་ཤེས་བཟང་པོ་ག་ལ་སྐྱེ།།ངེས་ཤེས་བཟང་པོ་མ་སྐྱེས་ན།།སྒྲོ་འདོགས་ངན་པ་ག་ལ་ནུབ།།སྒྲོ་འདོགས་ངན་པ་མ་ནུབ་ན།།ལས་རླུང་ངན་པ་ག་ལ་བཀག།ལས་རླུང་ངན་པ་མ་འགགས་ན།།འཁོར་བ་ངན་པ་ག་ལ་སྤོང་།།འཁོར་བ་ངན་པ་མ་སྤོང་ན།།སྡུག་བསྔལ་ངན་པ་ཅི་ལ་འཛད།།འཁོར་དང་མྱ་ངན་འདས་པ་ལ།།དོན་དུ་བཟང་ངན་ཡོད་པ་མ་ཡིན།།བཟང་ངན་མེད་པར་མཉམ་ཉིད་དུ།།རྟོགས་པ་ངེས་ཤེས་བཟང་པོ་ཡིན།།ངེས་ཤེས་བཟང་པོས་འཁོར་བ་འདི།།སྤངས་ནས་མྱང་འདས་མ་བསྒྲུབ་པས།།འགལ་བ་ལྟར་སྣང་ཚིག་གི་དོན།།མི་འགལ་ལམ་གྱི་གལ་མདོ་སྟེ།།ལྟ་སྤྱོད་མན་ངག་གནད་གསང་འདི།།དཔྱད་དེ་དོན་གྱི་རོ་མྱོངས་ཤིག།བར་དུ་དཔྱད་འཇོག་སྤེལ་དགོས་ཏེ།།དཔྱད་ན་ངེས་ཤེས་སྐྱེ་འགྱུར་ཞིང་།།མ་དཔྱད་ཐ་མར་ཞེན་གྱུར་ཚེ།།དཔྱད་ཅིང་དཔྱད་ཅིང་ངེས་ཤེས་དྲངས།།ངེས་ཤེས་སྐྱེས་ན་དེ་གའི་ངང་།།མ་ཡེངས་རྩེ་གཅིག་ཉིད་དུ་བསྒོམ།།ངེས་ཤེས་དང་ནི་སྒྲོ་འདོགས་ཡིད།།ཕན་ཚུན་འགལ་བ་ཉིད་ཀྱི་ཕྱིར།།དཔྱད་པས་སྒྲོ་འདོགས་སུན་ཕྱུང་བས།།ངེས་ཤེས་གོང་ནས་གོང་དུ་སྤེལ།།ཐ་མར་དཔྱད་པས་མ་དྲངས་ཀྱང་།།ངེས་ཤེས་ངང་གིས་སྐྱེ་བ་ན།།དེ་གའི་ངང་དུ་འཇོག་པ་ལས།།དཔྱད་པས་གྲུབ་ཟིན་བསྒྲུབ་ཅི་དགོས།།ཐག་པར་སྦྲུལ་མེད་རྟོགས་པ་ན།།ངེས་ཤེས་དེ་གས་སྦྲུལ་འཛིན་ལྡོག།ད་རུང་སྦྲུལ་ནི་མེད་དོ་ཞེས།།ཡང་ཡང་དཔྱད་ཟེར་བླུན་མིན་ནམ།།འཕགས་ལམ་རྟོགས་པ་མངོན་གྱུར་ཚེ།།ད་དུང་དཔྱད་པས་མི་བསྒོམ་སྟེ།།མངོན་སུམ་རྟོགས་ལ་རྒྱུ་མཚན་གྱི།།ཡིད་དཔྱོད་སྦྱོར་བ་ཅི་ཞིག་དགོས།།གལ་ཏེ་དཔྱད་པ་དང་བྲལ་ཚེ།།དོན་དམ་རྟོགས་པ་མི་འགྲུབ་ན།།འཕགས་དང་རྒྱལ་བའི་ཡེ་ཤེས་དང་།།འཇིག་རྟེན་གནོད་མེད་ཤེས་པ་ཡིས།།བཟུང་རྣམས་ཁྱོད་ལ་ཕྱིན་ཅི་ལོག།ཉིད་དུ་ཐལ་ཏེ་དེ་དག་ནི།།རྟོགས་ཟིན་ཡིན་ཕྱིར་དེ་དག་ལ།།རང་དུས་དཔྱད་པ་མེད་པའི་ཕྱིར།།མཐའ་བཞིའི་སྤྲོས་དང་བྲལ་བ་ཡི།།ངེས་ཤེས་ཁྱད་པར་ཅན་གྱི་ངོར།།འདི་དང་འདིའོ་སྙམ་པ་ཡི།།དམིགས་གཏད་དཔྱོད་པ་སྐབས་མི་ཐོབ།།གང་ཚེ་དཔྱོད་པའི་མཚན་འཛིན་དེས།།དར་གྱི་སྲིན་བུ་ཇི་བཞིན་དུ།།རྟོག་པ་དེ་ཡིས་དེ་བཅིངས་ནས།།ཡང་དག་དོན་ཇི་བཞིན་མི་མཐོང་།།ངེས་ཤེས་ཁྱད་པར་ཅན་འདིས་ནི།།ཡིན་ལུགས་སྒྲིབ་པའི་སྨག་བསལ་ཚེ།།གཉུག་མ་དོན་གྱི་འོད་གསལ་དང་།།དེ་ཉིད་མ་ནོར་མཐོང་བ་གང་།།སོ་སོ་རང་གི་ཡེ་ཤེས་ཏེ།།སེམས་བྱུང་ཤེས་རབ་ག་ལ་ཡིན།།ཤེས་རབ་ཡུལ་ནི་འདིའོ་ཞེས།།རྣམ་པར་འབྱེད་ཅིང་དེ་རྟོག་ལ།།གང་ཕྱིར་ཡུལ་དང་ཡུལ་ཅན་དང་།།སྣང་སྟོང་རེ་རེ་གང་དུ་ཡང་།།མི་དམིགས་མཉམ་པའི་ཡེ་ཤེས་འདི།།སེམས་དང་སེམས་ལས་བྱུང་བ་ཡི།།མཚན་ཉིད་ཅན་དུ་གནས་མ་ཡིན།།དེ་ཕྱིར་དཔྱད་པས་དྲང་བ་ཡི།།ངེས་ཤེས་མཆོག་ལ་མཉམ་བཞག་པའི།།ཤེས་རབ་དྲི་མ་མེད་པའི་རྒྱུས།།འབྲས་བུ་ཟུང་འཇུག་ཡེ་ཤེས་ཐོབ།།ལྟ་བ་གཏན་ལ་ཕབ་པ་དང་།།ངེས་པའི་གྲུབ་མཐའ་སྒྲུབ་བྱེད་པ།།ཤན་འབྱེད་སོ་སོར་རྟོག་པ་ཡིན།།ཤེས་རབ་དྲི་མེད་ཚད་མ་ཡིན།།དེས་དྲངས་པ་ཡི་ངེས་ཤེས་ཀྱི།།ལམ་ནས་ཡིན་ལུགས་གཤིས་ཕེབ་པའི།།མཉམ་བཞག་ཡེ་ཤེས་གང་ཡིན་པ།།ཐེག་ཆེན་ལམ་གྱི་དངོས་གཞི་དེ།།འདི་དང་ལྡན་ན་ཟུང་འཇུག་གི།གོ་འཕང་ཚེ་འདིར་སྟེར་བའི་ཕྱིར།།ཐེག་པ་ཡིན་ལ་ཆེན་པོའང་ཡིན།།རྒྱུད་སྡེ་བཞི་ཡི་ལུགས་ལྟར་ན།།བླ་མེད་ཚིག་དབང་ལམ་འདི་ནི།།ཡེ་ཤེས་མཐར་ཐུག་ཡིན་མོད་ཀྱི།།ལོགས་སུ་ཐེག་པར་མ་བཞག་ཀྱང་།།དཔེར་ན་མཉམ་ཉིད་ཡེ་ཤེས་སྐུ།།རྩལ་དུ་བཏོན་ནས་འཆད་པ་ཡིན།།དཔལ་ལྡན་དུས་ཀྱི་འཁོར་ལོ་ལ།།རྒྱུད་ཀྱི་མཐར་ཐུག་བཞེད་པ་བཞིན།།བླ་མེད་རྒྱུད་སྡེའི་ནང་ནས་ཀྱང་།།དབང་བཞིའི་ལམ་གྱི་ཡེ་ཤེས་གང་།།རྩལ་དུ་བཏོན་ནས་འཆད་པ་འདི།།རྒྱུད་སྡེ་ཀུན་གྱི་དགོངས་པའི་མཐིལ།།ལན་གྲངས་བཅུ་དྲུག་བཞུས་པའི་གསེར།།ཤིན་ཏུ་དག་པ་དེ་བཞིན་དུ།།ཐེག་གཞན་གྲུབ་མཐའ་དཔྱད་པ་ཡིས།།ཇེ་བས་ཇེ་དག་འདིར་མཐར་ཕྱིན།།དེ་ཕྱིར་ཤེས་རབ་དྲི་མེད་ཀྱི།།ཚད་མས་འདི་དོན་གྲུབ་པའི་ཚུལ།།རྒྱུད་དང་དགོངས་པ་འགྲེལ་ཀུན་དང་།།ཆོས་བཟང་རིགས་པའི་རྣམ་དཔྱོད་ལ།།བསམ་ན་བདུད་ཀྱི་ཡུལ་ལས་འདའ།།མི་འཕྲོག་ཤེས་རབ་སྨིན་པར་བྱེད།།འོན་ཀྱང་ལྟ་བའི་དངོས་གཞི་ནི།།སྣང་སྟོང་ཕྱོགས་རེར་འཛིན་པ་སོགས།།སེམས་དང་སེམས་བྱུང་སྤྱོད་ཡུལ་དུ།།འདི་དོན་སྟོན་པར་བྱེད་པ་ནི།།བརྗོད་མིན་བརྗོད་བྱར་བྱས་པའི་ཕྱིར།།མཁས་པའི་དགོངས་པ་ཉིད་དང་འགལ།།གང་ཕྱིར་ཨ་ཏི་ཡོ་ག་ནི།།སྣང་སྟོང་བསམ་གྱིས་མི་ཁྱབ་པའི།།